მასტერ ლიგის მსვლელობის პარალელურად გრძელდება საუკეთესო ფეხბურთელების გამოვლენა. მეშვიდე ტურში შესანიშნავად იასპარეზა და თავი წარმოაჩინა ნიკოლოზ გაბრიჩიძემ, რაც ტურნირის საორგანიზაციო ჯგუფს და კომპანია Apple City-ს არ გამოპარვია. ახალგაზრდა ფეხბურთელი სრულიად დამსახურებულად დასახელდა VII ტურის საუკეთესოდ. სწორედ ამიტომ დავინტერესდით „თბილისის მერიის“ 10 ნომრით, რომელთან ინტერვიუსაც შემოგთავაზებთ.

გამარჯობა, ნიკოლოზ. ჩვენი ჩემპიონატის ბომბარდირთა დავაში 14 გოლით ლიდერი ხარ, ტურის საუკეთესოდ გაღიარეს და ბუნებრივია, სიმბოლოურ ნაკრებშიც დასახელდი. გილოცავ ამ ყველაფერს და მოდი გაგვეცანი, მოგვიყევი შენზე და შენს ფეხბურთთან კავშირზე...

მე ვარ ნიკოლოზ გაბრიჩიძე 23 წლის, დავიბადე თბილისში და ბავშვობიდან მიყვარს ფეხბურთი. პატარა ასაკშივე უბანში ვთამაშობდი.შემდეგ ოჯახში გადაწყდა, რომ ირაოს სკოლაში შევსულიყავი და აქედან დაიწყო ჩემი საფეხბურთო კარიერა. მალევე შემიყვარდა ეს საქმე და მთელი გულით გადავერთე სპორტულ სამყაროში. ვთამაშობდი „დინამოს“ დუბლებში, „ცხინვალში“, „ლოკომოტივში“ და „გაგრაში“.

საყვარელ გუნდზე და ფეხბურთელზეც გკითხავ, რომელმაც გავლენა იქონია შენს თამაშზე...

ფეხბურთელებიდან რონალდო და რონალდინიო მიყვარდა, სულ ვუყურებდი და ვცდილობდი მიმებაძა, ასევე, რა თქმა უნდა, ვახსენებ მესის  რომლის დონე, კლასი და შესაძლებლობები საზღვრებს სცდება. გუნდებიდან, ბავშვობიდან მილანს გამოვარჩევდი კალაძის, კაკას და იმ ვარსკვლავების ხათრით, რომლებიც ძველ მილანში თამაშობდნენ.

მასტერ ლიგაზე როგორ მოხვდი?

შარშან გავიგე თქვენი ჩემპიონატის შესახებ, მაგრამ ვერ მომიხერხდა მაშინვე და წელს თქვენი პრეზიდენტის, აკაკი ხლაბუსტოვის რეკომენდაციით დავემატე მერიის გუნდს და დიდ მადლობას ვუხდი ამ შესაძლებლობისთვის. ძალიან კარგად ავუღე ალღო. 7x7-ზე თამაში, სტადიონის ზომა და ტაიმების დროც ჩემთვის ძალიან კომფორტულია.

როგორ შეაფასებ ჩვენს ტურნირს?

ძალიან მომწონს თქვენი ტურნირი. არაჩვეულებრივადაა დალაგებული და ორგანიზებული ყველაფერი. დიდ საქმეს აკეთებს, პროპაგანდას უწევს ჯანსაღი ცხოვრების წესს, ფეხბურთს აყვარებს დამწყებებს და დიდ სიამოვნებას ანიჭებს ყველას, ვისაც ეს სპორტი უყვარს. ძალიან სასიამოვნოა თქვენი მხრიდან საუკეთესოების გამოვლენა და დასაჩუქრება, ესეც ერთგვარი მოტივაცია და სტიმულია თითოეული მონაწილისთვის.

რას ურჩევდი მათ, ვისაც ჯერ მასტერ ლიგა არ უთამაშიათ?

ყველას ვურჩევ ჩაერთონ, ითამაშონ და დაიმუხტონ დადებითი ემოციებით. მარტივადაც არაა აქ საქმე, დიდი კონკურენციაა და პირველ რიგში ვურჩევ, რომ ბევრი იმუშაონ საკუთარ თავზე. ასევე მნიშვნელოვანია დროის კონტროლი, რომ სწორად გადაანაწილონ ძალები და მთელი მატჩი კარგად ჩაატარონ.

კახი კალაძეზეც უნდა ვახსენოთ. გუნდში გყავს ადამიანი, რომელმაც ჩემპიონთა ლიგა ორჯერ მოიგო. რა შეგრძნებაა მასთან ერთად თამაში?

ნამდვილად დიდი პატივი და სიხარულია. ყოველი თამაში მიხარია, სტიმულის მომცემია და სიამაყით ვივსები ხოლმე. ასევე მინდა ავღნიშნო და მოვიწონო კობიაშვილის, იაშვილის და ბევრი ისეთი დონის ფეხბურთელის მონაწილეობა, რომლებიც მისაბაძები არიან, ნამდვილად და მივესალმები მათ ჩართულობას ამ პროექტში.

მატჩების ნახევარი გასულია. თუ ადევნებ თვალს, როგორ შეაფასებ გუნდებს და რომელიმეს ხომ არ გამოარჩევდი?

დიახ, ვუყურებ ხოლმე თამაშებს და როგორც ჩანს სეუ, იბერონი, IFK-ანაგი და ამბასადორი  ძალიან კარგი გუნდებია. დიდი პოტენციალი აქვთ, გამოცდილები არიან და სერიოზულ კონკურენტებად  აღვიქვამ.

როგორ ფიქრობ, შესწევს შენს გუნდს იმის ძალა, რომ მასტერ ლიგა მოიგოს?

რა თქმა უნდა, მჯერა ჩემი და ჩემი გუნდის ძალების და ყველაფერს გავაკეთებთ რომ ეს ტურნირი მოვიგოთ. სრული სერიოზულობით ვუდგებით, ვემზადებით და იმედი მაქვს წარმატებასაც მივაღწევთ.

საუბრის ბოლოს სამომავლო გეგმებზეც რომ გვითხრა...

დიდი ფეხბურთის გაგრძელება მინდა, თუმცა ჯერ გარკვეული არაფერი მაქვს. ამ ეტაპზე მხოლოდ მასტერ ლიგით ვცხოვრობ, კვირიდან კვირამდე ველოდები ჩვენს თამაშს და დიდი მადლობა მინდა გადაგიხადოთ მთელ საორგანიზაციო ჯგუფს ამ სიხარულის მონიჭებისთვის.