უკვე მეორე წელია რაც 7x7 ფეხბურთის ასოციაციის ორგანიზებითა და ქალაქ თბილისის მერიის მხარდაჭიერით სამოყვარულო ჩემპიონატი ,,მასტერ ლიგა“ ტარდება.

წელს ჩემპიონატი საკმაოდ მასშტაბურია და საინტერესოდ მიმდინარეობს. ტარდება ძალიან სანახაობრივი თამაშები. ყოველი ტურის ბოლოს სახელდება საუკეთესო ფეხბურთელები, მხარდამჭერი კომპანიები კი მათ სპეციალური პრიზებით აჯილდოვებენ.

ამჯერად მასტერ ლიგამ და კომპანია Apple City -მ V ტურის საუკეთესოდ გიორგი ბაგალიშვილი დაასახელა, რომელთან ინტერვიუსაც გთავაზობთ.

-გიორგი, მოგესალმები. ტურის საუკეთესოდ გაღიარეს, რაც ძალიან სასიხარულო ამბავია, გილოცავ და ჩვენი საუბარი შენი გაცნობით დავიწყოთ. წარადგინე თავი ორიოდე წინადადებით...

-სალამი, დიდი მადლობა აღიარებისთვის. რაც შემეხება მე, დავიბადე სიღნაღის რაიონის ქალაქ წნორში 1991 წლის 2 იანვარს.

-საიდან დაიწყო შენი ფეხბურთისადმი ინტერესი და სიყვარული?

-ფეხბურთისადმი ინტერესი ღრმა ბავშობიდან გამიჩნდა, დილიდან დაღამებამდე ეზოში ვთამაშობდი. ჩემი აზრით ყველა პატარა ფეხბურთელმა უნდა ითამაშოს ეზოს ფეხბურთი, რადგან ვთვლი რომ აქ ბევრი სასარგებლო უნარ-ჩვევა გამომუშავდება, ეს კი აუცილებლად დაეხმარებათ მომავალში დიდი ფეხბურთის თამაშში.

-რა გამოცდილება გაქვს ფეხბურთში ან ზოგადად სპორტში?

-ჩემს საფეხბურთო გამოცდილებას რაც შეეხება ვთამაშობდი „ვიტ ჯორჯიაში“, „გაგრაში“, ვიყავი ახალგაზრდული ნაკრების წევრი. სამწუხაროდ ჩემგან დამოუკიდებელი მიზეზების გამო ადრეულ ასაკში მომიწია თავის დანებება. მქონდა რამდენიმე წლიანი პაუზა. ფეხბურთში ჩემი დაბრუნება მთლიანად კლუბ „სპაერს“ უკავშირდება, რომელსაც ჩემს მეორე ოჯახად ვთვლი. 4 წლის განმავლობაში ვიყვი კაპიტანი, ამჟამად კი გუნდის სპორტული დირექტორი გახლავართ. შეიძლება ითქვას, ნულიდან დავიწყეთ ყველაფერი და უკვე ლიგა 3-ში ვართ. გვაქვს ბავშთა საფეხბურთო აკადემია, შესანიშნავი ინფრასტრუქტურა, სავარჯიშო პირობები და ძალიან დიდი გეგმები. ამ წარმატების მთავარი შემოქმედები კი გუნდის ხელმძღვანელი ბ-ნი ანზორ ჩუბინიძე და მწვრთნელი კახა მაისურაძე არიან.

-საყვარელი გუნდი/ფეხბურთელი და რატომ?

-არ შეიძლება ბარსელონა და მესი არ გიყვარდეს. ასევე საუკეთესოდ ვთვლი რონალდინიოს, რომლის თამაშის ყურებაც ერთი სიამოვნებაა. ქართველებიდან დიდ პატივს ვცემ და ვაფასებ კახა კალაძის საფეხბურთო შემოქმედებას.

-როდის გაიგე მასტერ ლიგის შესახებ და რატომ გადაწყვიტეთ რომ ჩართულიყავი?

-მასტერ ლიგაზე შარშან ტურნირის დაწყებისთანავე გავიგე, მაშინ პროფესიონალურ  ფეხბურთს ვთამაშობდი, წესებიდან გამომდინარე მონაწილეობას ვერ ვიღებდი, თუმცა დიდი ინტერესით ვაკვირდებოდი შორიდან. წელს მივიღე შემოთავაზება გუნდ SSPS-დან, სიამოვნებით დავთანხმდი და ჩავერთე ამ შესანიშნავ პროექტში.

-ზოგადად რომ შეაფასო ჩვენი ტურნირი და რას ეტყოდით მათ, ვინც ჯერ კიდევ არ თამაშობს მასტერ ლიგას?

-ძალიან მნიშვნელოვანი წამოწყებაა ეს პროექტი და ვთვლი,  რომ დიდ როლს ითამაშებს ქართული ფეხბურთის განვითარებაში, პოპულარიზაციასა და ჯანსაღი ცხოვრების წესის დანერგვაში. მიხარია, რომ ტურნირი მასობრივი გახდა, მთელი საქართველოს მასშტაბით იმართება და უკვე ძალიან პოპულარულია. ყველას, ვინც ვერ შეძლო დიდი ფეხბურთის თამაში ან უბრალოდ ძალიან უყვარს, საშუალება ეძლევა იათამაშოს, თავი წარმოაჩინოს და რაც მთავარია დიდი სიამოვნება მიიღოს. კონკრეტულად თბილისის მასტერზე ძალიან კარგი გუნდები და ფეხბურთელები შეიკრიბნენ და ყველას წარმატებას ვუსურვებ. ცალკე აღსანიშნავია ის, რომ ქართული ფეხბურთის ლეგენდებთან ერთად გვიწევს თამაში, რაც უდიდესი სიხარულია ჩემთვის და ალბათ ყველა მონაწილისთვის.

-და საუბრის ბოლოს  ქართულ ფეხბურთზე რას გვეტყვით? იქნებ პროგნოზიც გამოთქვა ევრო 2020-ს ფლეი-ოფის უახლოეს მატჩთან დაკავშირებით, რომელიც საქართველო-ბელარუსს შორის შედგება.

-ნაკრების თამაშებს ოპტიმისტურად ვუყურებ. ვთვლი, რომ გვყავს ისეთი ფეხბურთელები, რომლებსაც შეუძლიათ მატჩის ბედის სასიკეთოდ გადაწყვეტა. იმედია ყველა ჯანმრთელი და ოპტიმალურ ფორმაში მყოფი შეხვდება ამ მატჩს. ევროპის ჩემპიონატზე გასვლა უდიდესი წარმატება იქნება ისტორიაში, ეს კი ფეხბურთის შემდგომ განვითარებაზე უდიდეს ზეგავლენას მოახდენს.

-ვფიქრობ საინტერესო საუბარი გამოგვივიდა, რისთვისაც დიდ მადლობას გიხდი და წარმატებებს გისურვებ.

-დიდი მადლობა თქვენ ორგანიზატორებს, 7x7-ზე ფეხბურთის ასოციაციის პრეზიდენტ ბატონ აკაკი ხლაბუსტოვს და თბილისის მერიას ამ კარგი საქმის კეთებისთვის. ასევე მადლობას გადავუხდი ჩემი გუნდის მწვრთნელ კახა ჭარელს და თითოეულ თანაგუნდელს, რომელთა გარეშეც ჩემი წარმატებული თამაში არ გამოვიდოდა. მადლობელი ვარ კომპანია Apple City-ს შესანიშნავი საჩუქრისთვის და დაფასებისთვის. წარმატებები მასტერ ლიგას.