9, 10 და 11 ივლისს, თბილისის მასტერ ლიგის დასკვნითი ტური შედგა, რომელიც საჯარო რეესტრისა და თიბისის მატჩით გაიხსნა. საჯარო რეესტრს უკვე მე-7 ტურში ჰქონდა განაღდებული საჩემპიონო ოთხეულში მოხვედრა. ხოლო, თიბისის, მოგებისა და IFK-ს დამარცხების შემთხვევაში უნარჩუნდებოდა საჩემპიონო ოთხეულში მოხვედრის შანსი. შესაბამისად, თიბისი ბოლომდე ეცადა შანსის გამოყენებას და ჩემპიონატის ერთ-ერთ ლიდერს დამაჯერებლად ძლია ანგარიშით 5-3. თიბისელთა მხრიდან ჩვეულ სტილში შესანიშნავად გაისარჯა სოსო მალანია, რომელსაც მხარი აუბეს ზვიად ლობჟანიძემ, ალექსანდრე ღვინიაშვილმა და დიტო ანდღულაძემ. ამ მოგებით თიბისიმ დააგროვა რა 13 ქულა და საბოლოო ჯამში მე-5 ადგილი დაიკავა.

IFK-სა და გრასრუტს შორის გაიმართა მე-4 ტურის გადადებული მატჩი. აღსანიშნავია, რომ გრასრუტი ლურჯ ჯგუფში სეუსთან ერთად ერთადერთი დაუმარცხებელი გუნდი იყო და IFK-ს ერთგვარი რთული ამოცანის გადაჭრა უწევდა. მიუხედავად იმისა, რომ გრასრუტი ოპტიმალური შემადგენლობით იმყოფებოდა, IFK-მ სწორი გამართული ფეხბურთის წყალობით მოახერხა ჯგუფის ლიდერის დამარცხება ანგარიშით 2:1 და ამით საჩემპიონო ოთხეულში მოხვედრა გაინაღდა. გამარჯვებულთა რიგებში ჩინებულად გაისარჯა გიორგი ბოჭორმელი, რომელმაც მატჩის საუკეთესო მოთამაშის წოდებაც დაიმსახურა.

სეუმ ძალიან მარტივად, 14:2 დაამარცხა ზოომარტი. სეუელთა რიგებში კვლავ შესანიშნავად ითამაშა ნიკოლოზ მანგოშვილმა, რომელმაც მეტოქეს 9 გოლი გაუტანა და ერთ მატჩში გატანილი გოლების მასტერ ლიგის რეკორდი დაამყარა. ასევე, გამორჩეულად კარგი თამაში ჰქონდა შოთა გვაზავას, რომელმაც 2 გოლს 4 საგოლე გადაცემა დაუმატა და მატჩის საუკეთესო მოთამაშის წოდება დაისაკუთრა.

საინტერესო გამოდგა RR ESTATE-სა და შევარდენის დაპირისპირება. აღსანიშნავია, რომ შევარდენის ფეხბურთელები ძალიან კარგად მოქმედებდნენ მთელი მატჩის მანძილზე და დამაჯერებელი ანგარიშით 8:3 ძლიეს მეტოქეს. შევარდენის რიგებიდან ჰეთთრიკი შეასრულა გიორგი ალავიძემ, ასევე შესანიშნავად ითამაშა ალექსანდრე ბენაშვილმა, რომელმაც 2 გოლთან ერთად 2 საგოლე გადაცემა მიითვალა და მატჩის საუკეთესოს წოდება დაიმსახურა. 

გრასრუტისა და იმედის დაპირისპირება უხვგოლიანი და საკმაოდ საინტერესო გამოდგა, აღნიშნულ მატჩში ალექსანდრე ამისულაშვილმა შეძლო ნიკოლოზ მანგოშვილის რეკორდის გამეორება და მეტოქეს 9 გოლი გაუტანა. გარდა ამისა, შეხვედრაში გავიდა 23 გოლი (16:7) და ერთ მატჩში გასული გოლების რაოდენობით  დამყარდა მასტერ ლიგის ახალი რეკორდი, რომელიც ტვ იმედისა და ზოომარტის მატჩში დაფიქსირდა: 11:8 (19 გოლი). ალექსანდრე ამისულაშვილის გარდა გრასრუტის შემადგენლობაში შესანიშნავი მატჩი ჩაატარა ლევან კობიაშვილმა, რომელმაც ჰეთთრიკი შეასრულა და 4 საგოლე გადაცემაც მიითვალა აქტივში.  

მწვანე ჯგუფის დასკვნით ტურში ჯგუფის ლიდერი თბილისის მერია დაუპირისპირდა ჩემპიონატის ერთ-ერთ აუთსაიდერ აი გრუპს. მიუხედავად სატურნირო მდგომარეობისა აი გრუპისათვის აღნიშნულ მატჩს დიდი მნიშვნელობა ჰქონდა. გამარჯვების შემთხვევაში აი გრუპი ინარჩუნებდა 2020 წლის MASTER LEAGUE-ში დარჩენის შანსს. ხსენებულ დაპირისპირებაში წარმოუდგენელი თავდადება და ბრძოლისუნარიანობა გამოავლინა აი გრუპმა და ჯერ კიდევ მე-4 წუთზე საბა ქუნთელიას გოლით დაწინაურდნენ, ამის შემდეგ აი გრუპს კვლავ ქონდა ანგარიშის გაზრდის შესაძლებლობა თუმცა ლევან ჩიხრაძემ და კახა კალაძემ მოახერხეს მერიის წინ გაყვანა. თითქოს ამ ორ გოლს აი გრუპი უნდა გაეტეხა, მაგრამ პირველი ტაიმის მიწურულს ირაკლი უკლებამ შესანიშნავი „მაკრატელა“ დარტყმით აღადგინა წონასწორობა 2:2. მეორე ტაიმში აი გრუპს დასაკარგი არაფერი ჰქონდა და ცდილობდა მატჩში კვლავ დაწინაურებას, თუმცა გამოცდილი მოთამაშეებით დაკომპლექტებულმა გათამაშების ლიდერმა საბოლოოდ მაინც მოახერხა საკმაოდ ამბიციური და ლაღი ფეხბურთის მოთამაშე აი გრუპის გატეხვა და 9:4 დაამარცხა.

ძალიან ლამაზი მატჩი აჩუქა სტადიონზე მოსულ გულშემატკივარს LPA GINVENTOR-მა და SSPS-მა, მატჩი საყაიმო ანგარიშით 4:4 დასრულდა. შესანიშნავი მატჩი ჩაატარა  LPA GINVENTOR-ის კაპიტანმა ირაკლი ბურჭულაძემ, რომელმაც მატჩის საუკეთესო მოთამაშის წოდება დაიმსახურა.

ქიუ-ნეთისა და კროკობეთის შეხვედრა დიდ ინტრიგას ატარებდა, კროკობეთს 2020 წლის სეზონისათვის MASTER LEAGUE-ში დასარჩენად ფრეც აძლევდა ხელს, ხოლო ქიუ-ნეთს მხოლოდ გამარჯვება ესაჭიროებოდა საფლეიოფო ზონაში მოსახვედრად, რასაც ამ უკანასკნელმა შესანიშნავად გაართვა თავი და კროკობეთს ანგარიშით 8:6 ძლია. ხსენებულ შეხვედრაში შესანიშნავად იასპარეზეს რომან ხოჯავამ და გიორგი მამუჩიშვილმა, რომლებმაც ჰეთთრიკი შეუსრულეს კროკობეთს და ქიუ-ნეთს უმნიშვნელოვანესი სამი ქულის მოპოვებაში დაეხმარნენ.

9 გატანილი გოლი იხილა გულშემატკივარმა კრწანისისა და ტიბიას დაპირისპირებაში. დაძაბული პირველი ტაიმის შემდეგ, კრწანისმა რევაზ ინჯგიას კარგი თამაშის წყალობით მაინც მოახერხა ტიბიას დამარცხება ანგარიშით 6:3. ტიბიას მხრიდან სამივე გოლი თორნიკე ნემსაძის ანგარიშზეა.

მწვანე ჯგუფის დასკვნითი ტურის ცენტრალურ შეხვედრას წარმოადგენდა იბერონისა და ბუდაპეშტის დაპირისპირება. იბერონს, საჩემპიონო ოთხეულში მოსახვედრად ქულაც ყოფნიდა, ხოლო ბუდაპეშტს გამარჯვება ესაჭიროებოდა. საწყის წუთებში გუნდები მეტისმეტი სიფრთხილით გამოირჩეოდნენ და დაცვაში ყურადღებით თამაშობდნენ. პირველი ტაიმის მიწურულს ბუდაპეშტს ქონდა ანგარიშის გახსნის ბრწყინვალე შანსი, რომელიც ვერ გამოიყენა და პირველი ტაიმი უგოლო ფრით 0:0 დასრულდა. მეორე ტაიმში იბერონის თამაშში გარდატეხა შეიტანა ცვლილებაზე შემოსულმა გაგა ლეჟავამ და იბერონი 2 ბურთიანი უპირატესობით დაწინაურდა. მატჩის მიწურულს ასევე ცვლილებაზე შესულმა ვახო ნადიბაიძემ შორეული გასროლით ანგარიში შეამცირა, თუმცა ბუდაპეშტს დარჩენილი დრო არ ეყო მატჩის შედეგის შესაცვლელად და საბოლოოდ 2:1 დამარცხდა.