18, 19 და 20 მაისის, თბილისის მასტერ ლიგის მწვანე და ლურჯი ჯგუფების მე-6 ტურის მატჩები გაიმართა.

მწვანე ჯგუფში კვლავ წაუგებლად განაგრძობს ასპარეზობას თბილისის მერიის გუნდი, რომელმაც საკმაოდ შესუსტებული შემადგენლობით მოასპარეზე კროკობეთი 11:4 დაამარცხა და პრაქტიკულად გაინაღდა საჩემპიონო ოთხეულში ადგილი. მერიის რიგებიდან კვლავ ბრწყინვალედ გაისარჯა ჩემპიონატის ერთპიროვნული ბომბარდირი კახა კალაძე, რომელმაც 8 გოლი გაუტანა კროკობეთს.

უშეღავათო ბრძოლა გაიმართა ტიბიასა და იბერონის დაპირისპირებაში და მატჩის სცენარიც რამოდენიმეჯერ შეიცვალა, საბოლოოდ კი თორნიკე ნემსაძის შესანიშნავი თამაშის წყალობით ტიბიამ 7:4 დაამარცხა იბერონი და კვლავ შეინარჩუნა საჩემპიონო ოთხეულში მოხვედრის შანსი.  

საკმაოდ დაძაბული გამოდგა LPA GINVENTOR-სა და აი გრუპს შორის გამართული მატჩი. მიუხედავად ჯინვენტორის ფავორიტის სტატუსისა, აი გრუპის ფეხბურთელების სასახელოდ უნდა ითქვას, რომ მათ მეტოქეს არაფერი დაუთმეს, თუმცა ჯინვენტორის კაპიტანმა და ლიდერმა ირაკლი ბურჭულაძემ ამჯერადაც იკისრა ლიდერობა და დაძაბულ ბრძოლაში უმნიშვნელოვანესი 3 ქულა მოუტანა გუნდს. ამ მოგებით LPA GINVENTOR-მა ცხრილში მე-3 ადგილზე გადაინაცვლა. 

მწვანე ჯგუფის ყველაზე დაძაბული და საინტერესო მატჩი გაიმართა კრწანისსა და ბუდაპეშტს შორის. აღსანიშნავია რომ მე-6 ტურამდე ორივე გუნდს 7-7 ქულა ჰქონდათ დაგროვებული და ორივე მათგანისათვის აღნიშნული მატჩის შედეგს ძალიან დიდი მნიშვნელობა ქონდა. მიუხედავად, ბუდაპეშტის კარგი დასაწყისისა, რომელიც 2:0 ამარცხებდა უშუალო კონკურენტს, კრწანისელთა კაპიტანმა ლევან კვიციანმა ორი შესანიშნავი გასროლით აღადგინა წონასწორობა და ბოლო წუთებში გუნდების ფრთხილი თამაშის მიუხედავად, დათო დარჩიამ შეძლო კრწანისისათვის გამარჯვების მოპოვება (3:2). ამ მოგებით კრწანისმა 10 ქულა დააგროვა და მე-4 ადგილზე გადაინაცვლა.

აქტივში სამი ქულა ჩაიწერა SSPS-მაც, რომელიც ცხრილში მე-2 ადგილს ინარჩუნებს და მხოლოდ ქულით ჩამორჩება თბილისის მერიას. 

წინა ტურში სეუსთან განცდილი მარცხის შემდგომ გონს მოსვლა მოახერხა საჯარო რეესტრმა, რომელმაც 8:3 დაამარცხა ტვ იმედის საფეხბურთო გუნდი. რეესტრის შემადგენლობიდან შესანიშნავად გაისარჯა უჩა მამულაშვილი, რომელმაც მეტოქეს პოკერი შეუსრულა.

მეტად დაძაბული და საინტერესო გამოდგა IFK-სა და თიბისის დაპირისპირება. საწყის ტურებში განცდილი მარცხების შემდგეგ, თიბისიმ რამდენიმე მნიშვნელოვან დაპირისპირებაში იმარჯვა და მისი მორიგი მსხვერპლი ამჯერად ლურჯი ჯგუფის ერთ-ერთი ლიდერი IFK აღმოჩნდა. ამჯერადაც ბრწყინვალედ გაისარჯა თიბისის ნამდვილი ლიდერი სოსო მალანია, რომელიც გუნდს უმნიშვნელოვანესი გამარჯვების მოპოვებაში დაეხმარა და საბოლოოდ მატჩი თიბისის გამარჯვებით 4:3 დამთავრდა.

ზოომარტმა 8:3 დაამარცხა საკმაოდ სიმპატიური გუნდი RR ESTATE. ზოომარტელებმა გუნდური თამაშის წყალობით მნიშვნელობანი 3 ქულა აიღეს და დიდი ნაბიჯი გადადგეს MASTER LEAGUE-ში დასარჩენად.

ლიდერების გარეშე მოთამაშე გრასრუტმა მაინც მოახერხა საბურთალოს დამარცხება 7:2 და IFK-ს მარცხის ფონზე ერთპიროვნულად დაიკავა ლურჯ ჯგუფში მე-2 ადგილი. გრასრუტელთა მხრიდან შესანიშნავი თამაში ჩაატარა გიორგი ბერიშვილმა, რომელმაც 3-ჯერ  დაამწუხრა მეტოქე და საგოლე პასითაც გამოირჩა.

ყველაზე დრამატული და სანახაობრივი გამოდგა ლურჯი ჯგუფის ცენტრალური მატჩი სეუსა და შევარდენს შორის. საწყის წუთებში გაშვებული გოლის შემდგეგ ნიკოლოზ მანგოშვილის შესანიშნავი თამაშის წყალობით სეუ სამჯერ უგებდა მეტოქეს, თუმცა შევარდენის ტრიოს -  უშარაულის, მარცვალაძის და ალადაშვილის კარგი თამაშის წყალობით შევარდენმა მაინც მოახერხა ქულის მოპოვება, საბოლოოდ მატჩი საყაიმო ანგარიშით 4:4 დასრულდა.

თბილისის მასტერ ლიგის ბომბარდირების შვიდეული და VI ტურის სიმბოლური ნაკრები კი ასე გამოიყურება: