თბილისის მასტერ ლიგის მესამე ტური 7 ივნისს, ჰენკასა და ამბასადორს შორის მატჩით გაიხსნა. პირველივე თამაში ძალიან სანახაობრივი და დაძაბული გამოდგა. გუნდები გარდამავალი უპირატესობით მოქმედებდნენ და ბოლო წამებამდე დაძაბულობა არ ნელდებოდა. 8 გოლი თანაბრად გაინაწილეს და შედეგიანი ფრე, 4-4 დააფიქსირეს. ვიხილეთ ორი ჰეთ-თრიკი, ჰენკას ლაშა ჯოხაძის და ამბასადორის აკაკი შენგელიას მხრიდან. საუკეთესოდ აკაკი დასახელდა, გუნდებმა კი ქულები გაიყვეს.

7 კოდი ინტერსპორტთან მატჩს აუთსაიდერის რანგში ხვდებოდა. მიუხედავად ამისა, გუნდმა საგრძნობი წინააღმდეგობა გაუწია საქართველოს მოქმედ ჩემპიონს და პირველი ტაიმი მოუგო კიდეც. მეორე ტაიმში სულ სხვა ინტერსპორტი დაბრუნდა და ბიჭებმა საქმეს მიხედეს. ჩემპიონებმა 4 გოლი გაიტანეს და თითქმის ყველა მათგანში ირაკლი ხუჭუა მონაწილეობდა. ირაკლის საუკეთესოს წოდება, ინტერსპორტს მორიგი 3 ქულა და სატურნირო ცხრილის ზედა ნაწილში სიმჭიდროვეა.

ტურის გახსნითი დღე ცენტრალური მატჩით დაიხურა. თბილისის ორგზის ჩემპიონი სდსს ძალიან მაგარ ფრომაში მყოფ ბუდაპეშტს უპირისპირდებოდა. სდსს ფავორიტის სტატუსით იყო, მაგრამ ამ ნარატივმა დიდხანს არ გასტანა... ჯეჯო ჯალიაშვილმა და ლუკა ბლიაძემ ტომ კრუზი და ველ კილმერი გაგვახსენეს ფილმიდან Top Gun. ბუდაპეშტის ლიდერთა დუეტმა ორმაგ ცეცხლში მოაქციეს მრისხანე მეტოქე და ბაგალიშვილის ჰეთ-თრიკს, 6 გოლით უპასუხეს. ლუკას - დუბლი, ჯეჯოს - პოკერი და საუკეთესოს წოდება, ბუდაპეშტს - ეფექტური 3 ქულა და ეს სეზონი ბევრ საინტერესოს გვპირდება.

მესამე ტური 9 ივნისს, ბენე სპორტსა და მერიის უსაფრთხოებას შორის მატჩით განახლდა. ბენე სპორტი ორჯერ იყო წინ ერთი გოლით, ორივე მათგანი ლამაზი დარტყმებით დავით ბოლქვაძემ გაიტანა, საუკეთესოდაც დასახელდა, მაგრამ ჩერნიშოვისა და კაზარიანის გოლებით უსაფრთხოებამ ქულები გაუყო მეტოქეს: 2-2.

მეორე მატჩი სპარტასა და გრასრუტს შორის შედგა. ესეც წინა თამაშივით დაძაბული გამოდგა, თუმცა გოლი აქ ბევრად მეტი გავიდა. აკაკი წყაროზია შესანიშნავად გამოიყურებოდა. მის დუბლს ასევე დუბლები მოაყოლეს მუჯირმა და ჯაფარიძემაც. ლაშა გურგენიძის და ლევან შარაშიძის ერთბაშად ხუთმა გოლმა ვერაფერი უშველა სპარტას: 7-5.

11 ივნისს, მესამე ტურის ბოლო დღე ჰაილაითების ცვენით დაიწყო.  ჰენკამ და თბილისის მერიამ ერთმანეთს 11 გოლი გაუტანეს. საქმე იმაში იყო, რომ ამ 11-დან 8 მერიამ გაიტანა და 8-დან 6 კახა კალაძემ შეაგდო. ეს პირველი შემთხვაა ამ სეზონში, როცა მოთამაშემ ერთ თამაშში 6 გოლი გაიტანა. დამაჯერებელი გამარჯვება მერიას: 8-3.

შემდეგ მატჩში, იბერონი ბასიანის წინააღმდეგ ფავორიტი იყო და ეს სტატუსი მალევე დაადასტურა. გუნდი, როგორც ყოველთვის, კომბინაციურად თამაშობდა და 8 უპასუხო გოლი გაიტანა მეტოქის კარში. ამ 8-დან 3 ლევან კვიციანის ანგარიშზე იყო და სწორედ ის დასახელდა საუკეთესოდ.

მესამე თამაში როალ სიტისა და შუნგიტს შორის შედგა. როალ სიტის თავისი ლიდერი ნია კლიფორდი აკლდა და ეს შედეგზეც აისახა. გუნდმა ორი გოლის გატანა მოახერხა, მაგრამ შუნგიტელებს უფრო დამაჯერებელი პასუხი ჰქონდათ ამაზე და პასუხად 4 ბურთი შეაგდეს. 4-დან 3 გოლი გიორგი ღონღაძის ანგარიშზე იყო და საუკეთესოს წოდებაც სწორედ მან დაიმსახურა.

ტური სეუსა და ანაგს შორის მატჩით დაიხურა. თამაში მოლოდინისამებრ დაძაბული და ორთაბრძოლებით აღსავსე გამოდგა. სეუ ორჯერ დაწინაურდა, მაგრამ ანაგმა ორივეჯერ მოახერხა ანგარიშის გაქვითვა და შედეგად 2-2, გუნდებმა ქულები გაიყვეს, საუკეთესოდ კი ილია გადელია დასახელდა.