29 მაისს, მასტერ ლიგა 3-ის მეორე ტურის თამაშები გაიმართა. გახსნითი მატჩი შედგა ბენროისა და ადვოკატთა ასოციაციას შორის. ბენროიმ მოახერხა ერთი გოლის გატანა, მაგრამ ადვოკატები გაცილებით უფრო დამაჯერებლად გამოიყურებოდნენ და შედეგად დაამარცხეს მოწინააღდეგე, ანგარიშით 3-1. ადვოკატებს უკვე 6 ქულა აქვთ, საუკეთესო მოთამაშედ კი დაცვაში იდეალური თამაშისთვის დასახელდა გრიგოლ მუმლაძე.

საბა კონსტრაქშენი - სექტორ 27: სექტორ 27-ის გიგა ივანიძემ დუბლი შეასრულა, თუმცა ეს საკმარისი არ აღმოჩნდა, რადგან საბას ბიჭებმა ორი დუბლით უპასუხეს და დაძაბული მატჩის მიუხედავად, დამაჯერებელი გამარჯვება, 5-2 მოიპოვეს. საუკეთესოდ კი, ერთ-ერთი დუბლის ავტორი დავით გეფერიძე დასახელდა.  

დომსონი - აგორა: ეს დაპირისპირება გარდამავალი უპირატესობით მიმდინარეობდა, საბოლოოდ კი მატჩი 3-2 დომსონის სასარგებლოდ დასრულდა. საუკეთესო მოთამაშედ, დუბლის ავტორი გიორგი გოგუა დასახელდა.

მსაჯის სასტვენის ხმა გასმა თუ არა, ტავ ჯორჯიამ მძლავრად შეუტია ამბრის და დავით დერესიანის უძლიერესი დარტყმით პირველივე წუთზე გაიხსნა ანგარიში. ასე გაგრძელდა მთელი მატჩის მანძილზე და ტავ ჯორჯიამ კიდევ 2 გოლი გაიტანა. მთავარი ის იყო, რომ გამარჯვებულმა გუნდმა გოლი არ გაუშვა, მიუხედავად ამბრის აქტიური მცდელობისა. ამ ყველაფერში კი მთავარი როლი ტავ ჯორჯიას მეკარემ, მალხაზ ონოფრიშვილმა ითამაშა და დაიმსახურა კიდეც საუკეთესო მოთამაშის წოდება.

შემდეგი მატჩი ლისური დერბი იყო, ლისი დეველოპმენტი ლისი ლაიონსის წინააღმდეგ. ლომების პრაიდი მთელი მატჩის მანძილზე ფლობდა უპირატესობას, დეველოპმენტმა 2 გოლი შეაგდო, მაგრამ ლაიონსის ლიდერი, ლაშა ჩაჩიბაია, როგორც ყოველთვის მოწოდების სიმაღეზე იყო, დუბლიც შეასრულა და თამაშის სადავეებსაც მთელი მატჩის მანძილზე აკონტროლებდა. 5-2 გამარჯვება, ლაშა ჩაჩიბაიას საუკეთესოს წოდება და 6 ქულა ლაიონსს.

შუნგიტი 2 - სკ.ირ: ეს მატჩი მთლიანად შუნგიტის კარნახით მიმდინარეობდა და შედეგიც შესაბამისი დადგა: 4-0 და მშრალად შენახული კარის კვალდაკვალ ლევნ აღაპიშვილს ხვდა წილად საუკეთესო მოთამაშის წოდება.

ბეთალივმა წარმატებული სტარტი იმავე პათოსით განაგრძო და მორიგი დამაჯერებელი გამარჯვება მოიპოვა ფეიდეის წინააღმდეგ. ნიკა შანიძე თითქოს ყველგან იყო მოედანზე, მის დუბლს ცხომელიძემ თავისი ლამაზი დუბლიც დაუმატა და შედეგად 4-1, 6 ქულა ჯამში, შანიძეს საუკეთესოს წოდება და მასტერ ლიგის გენერალური სპონსორი დამაჯერებლად ასპარეზობს.

ტურის ერთადერთი ფრე დაფიქსირდა ვაკე - ჯოგა ბონიტოს დაპირისპირებაში. წამალაშვილმა და წერედიანმა თითო ბურთი გაიტანეს და გუნდები პარიტეტზე გავიდნენ. ლევან წამალაშვილი საუკეთესოდ დასახელდა.

ვი არ იუნაიტედისა და ქეი ეფ სის დაპირისპირება ძალიან დაძაბული გამოდგა, იყო ბევრი ორთაბრძოლა, ბევრი ჯარიმა, 4 ყვითელი ბარათი და ფრეც დიდი ხნის მანძილზე ფიქსირდებოდა. ბოლოს ქეი ეფ სიმ გატეხა ნავსი და გამარჯვების გოლი გავიდა იუნაიტედის კარში. ქეი ეფ სიმ 2-1 მოიგო, საუკეთესოდ ჯიბილო ნიჟარაძე დასახელდა და მძიმე ბრძოლაში მათ 3 ქულა წამოიღეს.

ორი მძიმე მატჩის შემდეგ სანახაობის დროც დადგა და ეს სანახაობა, ბოლო მატჩის შემდეგ, სახლში გლოვომ გაგვატანა. გლოვოს ბიჭები თითქოს მოტოციკლებით იყვნენ მოედანზე, ისინი უბრალოდ დაფრინავდნენ და ერთი მეორეზე ლამაზი გოლი გაჰქონდათ მინისოს კარში. ასეთი ლამაზი გოლი მათ 9-ჯერ გაიტანეს მოწინააღმდეგის კარში და ამ სეზონში ყველაზე დამაჯერებელი გამარჯვებაც მოიპოვეს. გლოვოს ოთხმა მოთამაშემ შეასრულა დუბლი, აქედან ერთი გაბრიელ ჭოლაძეს ეკუთვნის და ყველაზე მეტად ამ „ჰაილაითებს“ შორის მისი პირველი შედევრი გამოირჩა. გაბრიელი საუკეთესოდ დასახელდა, გლოვომ კი ულამაზეს სტილში მოიპოვა 3 ქულა. 

მეორე ტურის ფოტოკოლაჟი

სტატიის ავტორი: ანრი ფხაკაძე