თბილისის მასტერ ლიგა: II ტურის მიმოხილვა
მასტერ ლიგის მეორე ტური მანტისსა და ამბასადორს შორის მატჩით გაიხსნა. პირველი ტაიმი ამბასადორის უპირატესობით მიმდინარეობდა და ეს უპირატესობა მათ მეორე ტაიმის დასაწყისშივე გოლად აქციეს. ასე გრძელდებოდა ბოლო წუთებადე სანამ ამ დაპირისპირების საუკეთესო მოთამაშემ - ლაშა სილაქაძემ გაათანაბრა ანგარიში, ბოლო წუთზე კი გიგი მამალაძემ დაასრულა Сomeback-ი, 1-2 და ამბასადორმა დრამატულ მატჩში გაინაღდა 3 ქულა.
შემდეგი მატჩი, 7 კოდი - ჰენკა. აქაც, ჯერ ჰენკამ გახსნა ანგარიში, 7 კოდმა გაათანაბრა და პირველი ტაიმიც 1-1 დაჯდა. მეორე ტაიმში ყველაფერი 7 კოდის კარნახით მიმდინარეობდა, კიდევ ორი გოლი, აქედან ერთი - ბოლო წამზე ნიკა ენუქიძისგან, რომელიც ამ მატჩის საუკეთესო მოთამაშედ დასახელდა და 3 ქულა მოუტანა თავის გუნდს.
მესამე თამაში, სეუ - სდსს. რთულია მოვძებნოთ გუნდი, რომელთანაც სდსს ფავორიტი არ იქნება და არც ეს მატჩი იყო გამონაკლისი. დავით ღლონტის უამრავი სეივი, მიუხედავად 4 გაშვებული გოლისა, ბაგალიშვილის ტრადიციული დომინაცია და მორიგი პოკერი. შედეგად, გიორგი ბაგალიშვილი მატჩის საუკეთესო მოთამაშე, ანგარიში 4-7 და მორიგი გამარჯვება სდსს-ს.
ბასიანი - ბენე სპორტის მატჩი დაწყებამდე იყო გამორჩეული, რადგან ბენე სპორტის რიგებში მასტერ ლიგის სადებიუტო თამაშს ატარებდა საქართველოს ნაკრების ყოფილი კაპიტანი, ლევან ცქიტიშვილი. ამაზე უკეთეს დებიუტს გუნდი ვერც ინატრებდა - ჰეთ-თრიკი ბატონ ლევანს, 8-1 გამარჯვება ბენე სპორტს და ულევი პოზიტივი ტურნირის სტარტზე.
ინტერსპორტი - ბუდაპეშტი: ინტერსპორტს რეაბილიტაცია სჭირდებოდა პირველი ტურის შემდეგ, სადაც ისინი დიდი ანგარიშით დამარცხდნენ სდსს-თან. მოგეხსენებათ, ინტერსპორტის ბრძოლისუნარიანი ხასიათი და სწორედ ამის სრული დემონსტრირება გახლდათ ეს თამაში. საბა კობერიძემ თითქის ყველაფერი მოიგერია, ირაკლი ხუჭუამ რობერტო კარლოსი ჩართო, დათო გაგნიძე ბუდაპეშტის ყველა შეტევას გუდავდა, ჯაბა დვალი ვერავინ გააჩერა. შედეგად, ჯაბა მატჩის საუკეთესო გახდა, ძალიან კარგმა ბუდაპეშტმა 2 გოლი გაიტანა, მაგრამ ინტერსპორტის 5-მა აჯობა და რეაბილიტაციამაც წარმატებით ჩაიარა - 5-2.
გრასრუტს ალექსანდრე იაშვილი დაუბრუნდა და ეს დაბრუნება ორი ლამაზი გოლითაც აღნიშნა. მიუხედავად ამისა, მერიის უსაფრთხოებას სხვა გეგმები ჰქონდა ამ მატჩთან დაკავშირებით...ზაზა კობახიძე ყველგან იყო, მისმა გუნდმა 6 გოლი გაუტანა გრასრუტის სახელოვან ვეტერანებს. 6-3 და მნიშვნელოვანი გამარჯვება მერიის უსაფრთხოებას. აღსანიშნავია, რომ თამაშს საქართველოს ეროვნული ნაკრების მწვრთნელი, ვილი სანიოლი ესწრებოდა, რომელიც თავის ასისტენტს, გრასრუტის ფეხბურთელს - ადელ შადლს გულშემატკივრობდა.
მერია - სპარტა ტურის ერთ-ერთი ყველაზე დაძაბული მატჩი იყო, გუნდები ყველა სანტიმეტრისთვის იბრძოდნენ, ბურთი არ ჩერდებოდა, გოლები იცვლებოდა, მაგრამ გადამწყვეტი უპირატესობა მერიამ მოიპოვა, ხლაბუსტოვმა და თევზაძემ მესამე და მეოთხე შეაგდეს, 4-2-ის მერე უკვე ერთ გოლზე მეტი სპარტამ ვეღარ მოასწრო...მატჩის საუკეთესო მოთამაშე დუბლის ავტორი გიორგი თევზაძე, 4-3 და 3 ქულა მერიას.
ტურის დასკვნითი მატჩი გაიმართა ანაგსა და როალ სიტის შორის. პირველ ტურში გუნდებმა პოლარიზებული შედეგები დადეს - ანაგმა შესუსტებულ იბერონთან წააგო, ხოლო როიალ სიტიმ დამაჯერებლად მოუგო გამოცდილ სეუ-ს. ამ თამაშში ანაგმა მთელი თავისი მობილიზაცია ჩააქსოვა. როალ სიტიმ გახსნა ანგარიში, მაგრამ შემდეგ აფეთქდა ბახტაძე, ჯერ საგოლე პასი, მერე გამარჯვების გოლი, გიორგი ცხვედიანმაც ერთი გოლის გარდა არაფერი გაუშვა, შედეგი 2-1, საუკეთესო მოთამაშე ანაგის მინი ჯიჯი ბუფონი და ძალიან საჭირო 3 ქულა გუნდს.