კაჭრეთის „ამბასადორმა“ საქართველოს Master Cup-ის ფინალურ ეტაპს უმასპინძლა, სადაც ერთმანეთს დასავლეთ და აღმოსავლეთ კონფერეციის გამარჯვებული 4-4 გუნდი დაუპირისპირდა.

აღმოსავლეთ კონფერენციის ნახევარფინალებიდან პირველი მატჩი მასპინძელ „ამბასადორსა“ და ჩელენჯ ლიგის გამარჯვებულ „ინტერსპორტს“ შორის შედგა და ამ უკანასკნელის გამარჯვებით 2:1 დასრულდა. მოგებულთაგან გოლის ავტორები 17 წლის ნიჭერი ფეხბურთელი ოთო გაგნიძე და ასევე დიდი საფეხბურთო ინტელექტის მქონე გიორგი ფირანაშვილი გახდნენ, ამბასადორიდან კი მთელი შეხვედრა არაჩვეულებრივად ჩაატარა და გოლითაც გამოირჩა დიმიტრი ჩერნიშოვი.

დღის მეორე დაპირისპირება თბილისის ორგზის ჩემპიონ „SSPS“-სა და კასპის „გენერალს“ შორის გაიმართა და თბილისელთა დამაჯერებელი გამარჯვებით 9:3 დასრულდა. უდავოდ შეუდარებელია და პენტატრიკით დაადასტურა თავისი მაღალი დონე გიორგი ბაგალიშვილმა, თითო გოლით კი გიორგი გოგობერიშვილი, მიხეილ კენჭაძე, ბადრი ტეტუნაშვილი და ალექსანდრე ივანიშვილი გამოირჩნენ. დამარცხებულთაგან გიორგი დაბრუნდაშვილმა, ვალერი ზანგურმა და თორნიკე თაგვიაშვილმა გაიტანეს.

დასავლეთ კონფერენციის ნახევარფინალში 7:1 მოუგო „წყალტუბომ“ ლანჩხუთის „გურიას“. ერთადერთი გოლი ნიკა წერეთელმა გაიტანა. იმერელთაგან თავი გიორგი თევზაძემ (ჰეთ-თრიკი), დაჩი კოსტავამ (დუბლი), თორნიკე კაპანაძემ და ხვიჩა უგრეხელიძემ გამოიჩინეს.

ასევე, დასავლეთიდან 4:1 დათმო მატჩი სამტრედიის „ნახალოვკამ“ ბათუმის „რიოსთან“, რომელიც ახალგაზრდა მოტივირებული ფეხბურთელებითაა დაკომპლექტებული. ჰეთ-თრიკი ვიხილეთ გიორგი ქუთელიას შესრულებით, ერთი გოლი ზურა ბერიძემ გაიტანა. პრესტიჟის გოლი „ნახალოვკელთაგან“ თამაზ კიკაბიძემ ითავა.

MASTER CUP-ის აღმოსავლეთ საქართვლოს ფინალურ ეტაპზე 2:0 დაამარცხა „ინტერსპორტმა“ „სსპს“ და სუპერფინალის საგზური გაინაღდა. გოლები ოთო გაგნიძემ და თორნიკე მაჭავარიანმა გაიტანეს. აღსანიშნავია, რომ ეს გუნდები ჩემპიონატის ფარგლებში უკვე მეორედ გადაიკვეთნენ და ორივე შეხვედრა  ჩელენჯ ლიგის დებიუტანტი გუნდის გამარჯვებით დასრულდა. მიუხედავად დიდი გამოცდილებისა და გუნდში მოთამაშე შეუჩერებელი ბაგალიშვილისა, მოტივირებული და შეკრული „ინტერსპორტის“ წინააღმდეგ „სსპს“კვლავ უძლური აღმოჩნდა.

უაღრესად დაძაბული გამოდგა  MASTER CUP-ის დასავლეთის ფინალური დაპირისპირება „წყალტუბოსა“ და „რიოს“ შორის. მშრალი პირველი ნახევრის შემდეგ მეორე ტაიმი გაცილებით სანახაობრივი გამოდგა. წვიმიანი ამინდის გამო ბურთი ხშირად იცვლიდა მიმართულებას და ერთ-ერთ ასეთ ეპიზოდში წყალტუბოელთა კარში ავტოგოლი გავიდა. ტაიმის მიწურულს კი, ბათუმელმა გიორგი ქუთელიამ ულამაზესი გოლით გაათანაბრა და შედეგად დაინიშნა პენალტების სერია. მიუხედავად იმისა, რომ ფანტასტიური ალღოთი გამოირჩა იმერლების კიპერი და ფაქტობრივად ყველა კუთხე გამოიცნო, ვერც ერთი ბურთის მოგერიება შეძლო და შეხვედრა საბოლოოდ 5:4 ბათუმელთა  სასარგებლოდ დასრულდა.

5:0 დამთავრდა მესამე ადგილისთვის მატჩი „სსპს“-სა და „წყალტუბოს“ შორის. დუბლები გაიფორმეს გიორგი ბაგალიშვილმა და მიხეილ კენჭაძემ, ერთი გოლი კი დიეგო ლობჟანიძის ანგარიშზეა.

ძალიან ემოციური და უხვგოლიანი იყო საქართველოს MASTER CUP-ის სუპერფინალი „ინტერსპორტსა“ და „რიოს“ შორის. მატჩი თბილისელთა გამარჯვებით 7:5 დასრულდა. ორივე გუნდი მთელი თამაშის განმავლობაში ულამაზეს შეტევებს ახორციელებდა და შეიძლება ითქვას, რომ მაღალი დონითა და შესრულებით დაამტკიცეს, რომ ფინალში ყოფნას უდავოდ იმსახურებდნენ. რაც შეეხება გოლებს, ჰეთ-თრიკი შეასრულა ოთო გაგნიძემ, თითო გოლით კი გუნდს ირაკლი ხუჭუა, გიორგი ფირანაშვილი და თორნიკე მაჭავარიანი დაეხმარნენ. ერთი გოლიც „რიოდან“ ავტოგოლი გავიდა. ბათუმელთაგან დუბლი ვიხილეთ დავით ჭურკვეიძის შესრულებით, ასევე გაიტანეს მერაბ თებიძემ, დათო ნაკაშიძემ და კარენ მკრტიჩიანმა.

ასე და ამგვარად, საქართველოს MASTER CUP-ის 2020 წლის გამარჯვებული ჩელენჯ ლიგის დებიუტანტი და ნამდვილი აღმოჩენა „ინტერსპორტი“ გახდა. მეორე ადგილზე ბათუმის „რიო“ დამკვიდრდა, სამეულს „სსპს“ ხურავს.

შეგახსენებთ, რომ მასტერ ლიგა უკვე მეორე წელია ტარდება, თუმცა წელს ძალიან  მასშტაბური იყო. იგი საქართველოს 64 მუნიპალიტეტში ჩატარდა და მონაწილეობა 15 000-მდე სპორტსმენმა მიიღო. წელს შეიქმნა რანგით მეორე - ჩელენჯ ლიგა, რომელმაც დიდი ინტერესი და მოწონება დაიმსახურა. მომდევნო სეზონიდან კი დაემატება კიდევ ერთი ლიგა, რომელიც ახალ მონაწილეებთან ერთად ზედა ლიგიდან დაქვეითებული გუნდებით დაკომპლექტდება.

პროექტი ქალაქ თბილისის მერიისა და საქართველოს განათლების, მეცნიერების, კულტურისა და სპორტის სამინისტროს დაფინანსებით იმართება, მიზნად კი ფეხბურთის პოპულარიზაციის ხელშეწყობას და ჯანსაღი ცხოვრების წესის დანერგვას ისახავს.