მასტერ ლიგაზე VIII ტურის საუკეთესოდ ტურნირის საორგანიზაციო ჯგუფმა და კომპანია Apple City-მ „IFK ანაგის“ ფეხბურთელი კახი კეკოშვილი დაასახელა. ჩვენ შევეცდებით, უფრო ახლოს გაგაცნოთ ნიჭიერი ფეხბურთელი.

სალამი კახი, მოგვიყევი შენს შესახებ...

მე ვარ კახაბერ კეკოშვილი, დავიბადე ქ. ცხინვალში, 1987 წელს.

ფეხბურთის თამაში ჩემი ძმის მიბაძვით დავიწყე. ერთად ვცეკვავდით და როდესაც გადაწყვიტა თავი დაენებებინა, პატარა ვიყავი და მომინდა მეც მეთამაშა. დავიწყე „ნორჩი დინამოელით“, სადაც შეიძლება ითქვას ფეხი ავიდგი და დავიწყე ფეხბურთის შეცნობა. შემდეგ ბევრი კლუბი გამოვიცვალე, თუმცა ყველაზე კარგად მაინც ცხინვალის „სპარტაკი“ მახსენდება. ზუსტად მაგ დროს შეიქმნა ეს გუნდი. 21 წლის ვიყავი და სხვანაირი დამოკიდებულება მქონდა, ძალიან მონდომებული და მოტივირებული ვიყავი. 5-6 ფეხბურთელი ვიყავით წარმოშობით ცხინვალიდან და ჩვენთვის ემოციურად დიდი დატვირთვის მატარებელი იყო აქ ყოფნა. ჩვენი ქალაქისთვის ვთამაშობდი მთელი გულით და სიყვარულით. შემდეგ რატომღაც სწავლისკენ გადავიხარე და მხოლოდ ქუჩის ფეხბურთით შემოვიფარგლე, თუმცა მალევე აღმოვჩნდი ფუტძალში და თელავის გუნდში ვიყავი რაღაც პერიოდი, სადაც კარგი გამოცდილება მივიღე.

26 წლის შვედეთში წავედი სამუშაოდ, მაგრამ ისე მოხდა რომ ვერ შევეშვი საყვარელ სპორტს და იქაც გამოვნახე გზები. დავიწყე ადგილობრივ გუნდ “IFK Mariestad”-ში თამაში. ძალიან კარგი პერიოდი იყო, ბევრი მნიშვნელოვანი თამაში და ბევრი გოლი მახსენდება.

7x7- ზე თამაშს როგორ მოერგე?

მიუხედავად იმისა, რომ სხვადასხვა სტილის ფეხბურთი მითამაშია, 7x7- ზე კიდევ სხვა სპეციფიკაა. აქ ბევრი მოძრაობაა საჭირო და სულ ჩართული ხარ თამაშში. დიდს რომ შევადაროთ, კუთხურის მოწოდებამდე ელემენტარულად იმის დრო მაინც გაქვს რომ ცოტა ამოისუნთქო და აქ 1 წამი არ გაქვს მოსადუნებლად, გამუდმებით დაძაბული და  კონცენტრირებული ხარ თამაშზე. ამიტომ, ძალიან მნიშვნელოვანია ფიზიკური და ფსიქოლოგიური მომზადება.

მასტერ ლიგაზე როგორ მოხვდი?

მასტერ ლიგაზე თქვენი პრეზიდენტის, აკაკი ხლაბუსტოვისგან გავიგეთ. შარშან ჩავერთეთ და ძალიან კარგი დებიუტი გამოგვივიდა. ჩვენი მოთამაშე ილია გადელია ლიგის საუკეთესო ფეხბურთელად აღიარეს და სხვა რომ არა, მარტო ამად ღირდა ყველაფერი. ძალიან გამოცდილი ბიჭიებით დაკომპლექტებული გუნდი გვყავს, ბევრს შრომობენ მოედანზე და შედეგსაც დებენ შეძლებისდაგვარად. რაც ყველაზე მთავარია, პირველ რიგში დიდი მეგობრობა გვაკავშირებს, მეტ-ნაკლებად ვიცით ერთმანეთის შესაძლებლობები  და ეს ყველაფერი საერთო ჯამში გვეხმარება რომ კარგი ფეხბურთი ვითამაშოთ.

კონკურენტ გუნდებზე რას ფიქრობ?

მასტერზე, “SSPS“-ს გამოვარჩევდი, წინა სეზონის გამარჯვებულები არიან, საინტერესო გუნდია  და წელსაც აშკარად არ აპირებენ პოზიციის დათმობას. ასევე, კარგი გუნდი ჰყავს „თბილისის მერიას“, „იბერონს“, „სეუს“ და „ამბასადორს“. ჩელენჯ ლიგასაც ვადევნებ თვალს, გამოირჩა „არმია“ და „ვაზისუბანი“, რომლებიც გადმოვლენ მომდევნო წელს მასტერზე და საინტერესო იქნება აქ მათი ხილვა.

რჩევები მომავალ მასტერელებს...

მათ, ვისაც მასტერის თამაში სურს, ვურჩევდი ბევრი იმუშაონ, მიზანი დაისახონ და ხარისხიანად აკეთონ ყველაფერი ის რაც ფეხბურთს სჭირდება. უნდა დაიჯერონ საკუთარი ძალების და იფიქრონ შედეგზე, მოგებაზე ... ამაზე დიდი მოტივაცია არ არსებობს.

International Socca Federation - ის წევრი გავხდით, როგორ შეაფასებ ამ მოვლენას?

წელს, თითოეული მოთამაშისთვის დამატებითი მოტივაციაა ის, რომ 7x7 ფეხბურთის ასოციაცია გახდა ISF-ს წევრი. ორგანიზაციისა, რომელიც 50 ქვეყნის მსგავს ასოსიაციებს აერთიანებს და ყოველი წლის განმავლობაში მართავს არაერთ საკლუბო თუ სანაკრებო საერთაშორისო ტურნირს. ძალიან მაგარია, როცა შეგიძლია იასპარეზო საერთაშორისო ტურნირზე და საქართველო წარადგინო. მე მაქვს მსგავსი გამოცდილება, არსებობს ასეთი ორგანიზაცია - Homeless World Cup, რომელიც მართავს ასეთ საერთაშორის ტურნირებს. 19 წლის ვიყავი, ბრაზილიაში გავიცანი მათი წარმომადგენელი და მითხრა, რომ თუ შეიკრიბებოდა გუნდი საქართველოსაც ჩართავდნენ, მაგრამ მოგეხსენებათ მაშინდელი ქართული რეალობა და რა თქმა უნდა, ეს ამბავი არ გამოვიდა.

მასტერის მონაწილეებზე რას იტყვი?

მივესალმები ვეტერანი ქართველი ფეხბურთელების ჩართულობას მასტერზე. ამ ადამიანებს მთელი ბავშვობა შორიდან ვადევნებდით თვალს და აქ პირადად  ვეთამაშებით. ამას ბუნებრივია დიდი სიხარული და სიამოვნება მოყვება.

და საუბრის ბოლოს, როგორ ფიქრობ შეძლებთ მასტერის მოგებას?

ჩემი გუნდის პროგნოზს რაც შეეხება, რა თქმა უნდა, გაგვიჭირდება გამარჯვება. ფავორიტებიც არ ვიქნებით მატჩის, მაგრამ ჩვენ ყველანაირად ვეცდებით მაქსიმუმი შევასრულოთ და მოვიგოთ, რატომაც არა...

საუბრის ბოლოს ვისარგებლებ შემთხვევით და დიდი მადლობა მინდა გადავუხადო  თითოეულ ადამიანს ვინც მასტერ ლიგას აკეთებს. უდიდესი წამოწყებაა ნამდვილად. პოპულარიზაციაა ფეხბურთის, ჯანსაღი ცხოვრების წესის, ჩართულია მთელი საქართველო და ამაზე კარგი შესაძლებლობა დღეს მოყვარულ მოთამაშეებს ნამდვილად ვერ ექნებათ. ასე რომ, ყველას ვურჩევ შემოგვიერთდეს და იათამაშოს მასტერი. ნახავენ, როგორ გადმოერთვებიან აქაურ რეჟიმზე, დიდი სიხარულით დაელოდებიან ყოველ თამაშს, შეინარჩუნებენ კარგ ფიზიკურ კონდიციებს და მიიღებენ უდიდეს სიამოვნებას.