29 სექტემბრიდან მასტერ ლიგა VI ტურის მატჩებით განახლდა. პირველი დაპირისპირება ტიბიასა და მერიის უსაფრთხოებას შორის შედგა და ფრედ 5:5 დასრულდა. ლურჯ ჯგუფში 11 ქულა აქვს და მეექვსე ადგილს იკავებს ტიბია. მერიის უსაფრთხოება კი 4 ქულით მერვე პოზიციაზეა.

მორიგი შეხვედრა მთაწმინდასა და თბილისის მერიას შორის გაიმართა და აქაც ფრე 3:3 დაფიქსირდა. კვლავ კარგად ითამაშა თბილისის მერმა კახა კალაძემ, რომელმაც დუბლი შეასრულა და ბომბარდირთა დავაში 12 გოლით კვლავ ლიდერია. ასევე გაიტანა ნიკოლოზ გაბრიჩიძემც. მთაწმინდელთაგან კი თავი გიორგი ღონღაძემ, ნიკა ფირცხალავამ და ლაშა ნინიკაშვილმა გამოიჩინეს. ამ დროისთვის გუნდებს 11-11 ქულა აქვთ და მესამე-მეოთხე ადგილებს ინაწილებენ.

დამაჯერებლად 8:2 მოუგო ბუდაპეშტმა გარეჯს. გამარჯვებულთაგან ჰეთრიკი ვიხილეთ ჯემალ ჯალიაშვილის შესრულებით, რომელსაც ჯამში 11 გოლი დაუგროვდა და ბომბარდირთა დავაში ლიდერთა შორისაა. ასევე ჰეთრიკით გამოირჩა ლუკა ბლიაძე, დუბლი შეასრულა ლაშა ღონღაძემ. გარეჯიდან კი გიგი სამყურშვილმა და ლევან კოშაძემ გაიტანეს. ბუდაპეშტს 12 ქულა და ჯგუფში მესამე ადგილი აქვს, გარეჯი კი კვლავ აუტსაიდერია და 3 ქულით ბოლო - მეათე საფეხურზეა.

4:8 დამარცხდა კვარტალი ბენე სპორტთან გამართულ შეხვედრაში. მოგებულთა  რიგებში გოლებით კონსტანტინე ჭაბაშვილი (დუბლი), გიგი მამალაძე (დუბლი), ზურა აბესაძე (დუბლი), ლევან სარალიძე და ლაშა ჩუხუა გამოირჩნენ. კვარტალიდან ლუკა თავზარაშვილის ჰეთრიკი და გიორგი ხაჩიძის გოლი გავიდა. გუნდები სატურნირო ცხრილის აუტსაიდერები არიან. ბენე სპორტს მხოლოდ 3 ქულა გააჩნია და ჯგფში ბოლოსწინა, მეცხრე ადგილს იკავებს, კვარტალი კი ერთადერთი  ქულით ბოლოა.

მეექვსე ტურის მეორე სათამაშო დღე მზიურის მინი სტადიონზე მეგობრული ანგარიშით გაიხსნა. ფრედ 3:3 დასრულდა საჯარო რეესტრისა და იბერონის მატჩი. ამ შეხვედრის შემდეგ იბერონს 14 ქულა მოუგროვდა და მწვანე ჯგუფში მეორე საფეხურს იკავებს. რაც შეეხება გოლებს, დუბლი შეასრულა გიორგი მოდებაძემ, ერთიც ლევან კვიციანმა გაიტანა. საჯარო რეესტრი 4 ქულით ჯგუფში მერვეა, გოლები კი ლევან ფირანიშვილის, დავით გუჯაბიძისა და ოთო ხუციშვილის შესრულებით ვიხილეთ.

2:5 წააგო ირაომ GRASSROOT-თან დაპირისპირებაში. დუბლი შეასრულა გიორგი მაკასარაშვილმა. გრასრუტში კი გოლებით გაგა ჯაფარიძე (დუბლი), ალექსანდრე ამისულაშვილი, ალექსანდრე იაშვილი და ოთარ მარცვალაძე გამოირჩნენ. სატურნირო მდგომარეობით გრასრუტი 6 ქულას აგროვებს და მეექვსეა, ირაოს კი 4 ქულა და მეშვიდე ადგილი აქვს.

მორიგ შეხვედრაში სეუმ კიდევ ერთხელ დაამტკიცა, რომ ჯგუფის ლიდერია და ამჯერად IFK-ანაგს 3:1 მოუგო, შედეგად კი 16 ქულა დააგროვა. გოლის ავტორები გახდნენ ნიკოლოზ მანგოშვილი, ზურაბ ფიჩხაძე და ოთარ კუხალეიშვილი. ერთადერთი საპასუხო გოლი ანაგიდან გიორგი ბოჭორმელს ეკუთვნის, მის გუნდს კი ჯგუფში 9 ქულა და მეექვსე ადგილი აქვს.

ტურის ბოლო სათამაშო დღე გადადებული მატჩით დაიწყო. შეხვედრა GRASSROOT-სა ბენე სპორტის შორის შედგა და გრასრუტელების გამარჯვებით 6:4 დასრულდა. ტურის დასაწყისისგან განსხვავებით გაცილებით კარგად გამოიყურება ბენე სპორტი, რომელთაგანაც გოლები გრიგოლ ლეჟავამ (დუბლი), ლაშა ჩუხუამ და ზურაბ აბესაძემ გაიტანეს. გამარჯვებულთაგან კი გაგა ჯაფარიძე (დუბლი), ოთარ დოლიძე, ზურაბ ხიზანიშვილი და ალექსანდრე იაშვილი გამოიჩნენ.

სენსაციური გამარჯვება მოიპოვა ზოომარტმა ჯგუფის ლიდერ SSPS-თან. შეხვედრა 3:0 დასრულდა. 7 ქულა დააგროვა მატჩის გამარჯვებულმა და ჯგუფში მეექვსე ადგილს იკავებს. მარცხის მიუხედავად კვლავ პირველია SSPS, რომელსაც 13 ქულა აქვს. რაც შეეხება გოლებს, დუბლი გაიფორმა ირაკლი სიხარულიძემ, ერთიც არჩილ კელიხაშვილმა გაიტანა. აღსანიშნავია, რომ ეს დაპირისპირება SSPS-მ დიდი დანაკლისით ჩაატარა. გუნდს წამყვანი ფეხბურთელები: გიორგი ბაგალიშვილი, გიორგი ცაავა, ბადრი ტეტუნაშვილი და გიორგი გოგობერიშვილი ვერ დაეხმარნენ. 

1:3 დამარცხდა ბასიანი მანტისთან შეხვედრაში. ერთადერთი გოლი ლადო ხიდეშელმა გაიტანა. გამარჯვებულთაგან კი დავით გოგოლაძე, ვასილ აფციაური და როსტომ ციცქიშვილი გამოირჩნენ. მანტისს 12 ქულა აქვს და მეოთხე პოზიციაზე იმყოფება, ბასიანი კი 3 ქულით ბოლოსწინა მეცხრე საფეხურზეა.

ტურის ბოლო დაპირისპირება ამბასადორსა და აფხაზეთის გუნდებს შორის შედგა და მინიმალური სხვაობით 1:0 დასრულდა. შეხვედრის ერთადერთი გოლი ამბასადორელმა ზაზა კობახიძემ გაიტანა, მისმა გუნდმა კი 13 ქულა მოაგროვა და ლურჯ ჯგუფში მეორე ადგილს იკავებს. აფხაზეთი 6 ქულით მეშვიდეა.

მეექვსე ტურის შეხვედრების საუკეთესოებად გიგი მამალაძე (ბენე სპ.), ნიკა ფირცხალავა (მთაწმინდა), ჯეჯო ჯალიაშვილი (ბუდაპეშტი), გიორგი ლობჟანიძე (ტიბია), ალექსანდრე იაშვილი (გრასრუტი), თაზო ვახანია (სეუ), გიორგი მოდებაძე (იბერონი), დავით გოგოლაძე (მანტისი), ზაზა კობახიშე (ამბასადორი), ირაკლი სიხარულიძე (ზოომარტი) და გაგა ჯაფარიძე (გრასრუტი) დასახელდნენ, ისინი მასტერ ლიგის მხარდამჭერმა კომპანია ესტრელამ ტრადიციულად დაასაჩუქრა. ასევე, სპესიალური პრიზი გადაეცემა ტურის საუკეთესო ფეხბურთელს, ირაკლი სიხარულიძეს  Apple City-სგან.

მასტერ ლიგა VII ტურით 6 ოქტომბრიდან განახლდება.