მასტერ ლიგის მეცხრე ტური ბასიანსა და მერიის უსაფრთხოებას შორის მატჩით გაიხსნა. ლადო ხიდეშელმა წინა ტურში გატანილი პოკერის შემდეგ, აქაც დუბლი გააკეთა, მაგრამ რბილად რომ ვთქვათ, საკმარისი არ იყო... დიმიტრი ჩერნიშოვმა, რომელიც პოზიციით მცველია, 6 გოლი გუტანა ბასიანს და მერიის უსაფრთხოებამ საბოლოო ჯამში 8-3 სძლია მეტოქეს და ახლა ისინი მეხუთე პოზიციაზე იმყოფებიან.

თანაბარი ქულათა რაოდენობით ხვდებოდნენ მეცხრე ტურს თბილისის მერია და სსდს. თამაშიც ისეთივე დაძაბული და თანაბარი აღმოჩნდა, როგორიც გუნდების სატურნირო მდგომარეობა - გუნდები გოლებს ცვლიდნენ, სანამ მიხეილ კენჭაძემ გაისროლა. ბაგალიშვილის მსგავსად, მანაც დუბლი შეასრულა და სსდს-მა 4-3 მოიგო. მერია ათეულში დარჩა, სსდს მეექვსეზეა.

შემდეგი მატჩიც საკმაო ინტერესს იწვევდა. როიალ სითი საკმაოდ ბრძოლისუნარიანი გუნდია და მასტერ ლიგის ჩემპიონებთან მათი შეხვედრაც წესით დაძაბული უნდა ყოფილიყო. პროგნოზების მიუხედავად, ინტერსპორტმა მალევე იგდო ხელთ თამაშის სადავეები, მაჭავარიანმა ჰეთ-თრიკი შეასრულა, დავით გაგნიძე იდეალურ დაცვას თამაშობდა, გოლის გატანაც შეძლო და ჩემპიონებმა დამაჯერებლად, 6-0 მოუგო როიალ სითის. ინტერსპორტი პირველ ადგილზეა, როიალ სითიმ კი 11-ზე გადაინაცვლა.

შუნგიტი სპარტაზე 3 ქულით წინ იყო მეცხრე ტურამდე და მათ მიზნად ამ უპირატესობის გაზრდა და ათეულში ადგილის მოპოვება ჰქონდათ დასახული. კოტე ჯღარკავას და სხვა ლიდერების კარგი თამაშის წყალობით სპარტამ ჩაშალა შუნგიტის გეგმები და 5-2 გამარჯვების შემდეგ გაუთანაბრდნენ ქულებით უშუალო მეტოქეს.

ბენე სპორტს საგრძნობი წაგებათა სერია გამოუვიდა ბოლო ტურების მანძილზე და 7 კოდის წინააღმდეგ თამაშში, მათ რეაბილიტაცია სურდათ. გეგმა წარმატებით შეასრულეს, 7-1 სძლიეს მეტოქეს. რატი ალექსიძე ჰეთ-თრიკით გამირჩა, დავით ბოლქვაძემ კი დუბლი შეასრულა.

ტურის ბოლო მატჩი ანაგსა და მანტისს შორის შედგა. ანაგი თავიდანვე ფლობდა უპირატესობას, მანტისი ერთ მომენტში დაეწია კიდეც მეტოქეს, მათ 4 გაშვებული გოლის შემდეგ ორი გაიტანეს, თუმცა ამის შემდეგ ინტრიგა თამაშს აღარ დაბრუნებია - ანაგმა 8-2 მოიგო, მაისურაძე კი პოკერით გამოირჩა.

სტატიის ავტორი: ანრი ფხაკაძე