მასტერ ლიგის მერვე ტური 14 ივლისს, სდსს-სა და ბასიანს შორის მატჩით გაიხსნა. თამაში ძალიან სახალისო გამოდგა და ოპონენტი თავდამსხმელების დუელად იქცა - გიორგი ბაგალიშვილმა და ლადო ხიდეშელმა ნამდვილი შოუ მოუწყვეს გულშემატკივარს, ბაგალიშვილმა პენტატრიკი შეასრულა, ხიდეშელმა კი პოკერი. საბოლოო ჯამში სდსს-მ 9-4 მოიგო და 15 ქულით მეშვიდე პოზიციაზე გამაგრდა.

7 კოდსა და გრასრუტს შორის შეხვედრა ნამდვილ ფოიერვერკად იქცა გულშემატკივრისთვის. პირველ ტაიმში არც მეტი, არც ნაკლები - 9 გოლი ვიხილეთ! 7 კოდი მეორე ტაიმს ერთგოლიანი უპირატესობით, 5-4 შეხვდა. ტემპი დიდად არც მერე დავარდნილა, ანზორ ბერიძემ და ალექსანდრე იაშვილმა ჰეთ-თრიკები გაცვალეს, დუბლიც ლევან ვაშაკიძემ შეასრულა და ასე ცვლიდნენ გოლებს გუნდები თამაშის ბოლომდე, თუმცა გათანაბრებამდე საქმე ბოლომდე მაინც ვერ მივიდა და ეს ფეერიული მატჩი 7 კოდმა, ანგარიშით 8-7 მოიგო.

შემდეგი მატჩი ამბასადორსა და თბილისის მერიას შორის გაიმართა. ყველა დაძაბულ მატჩს ელოდა და თამაში მართლაც ასეთი გამოდგა, თუმცა ანგარიშში ეს ნაკლებად აისახა. ამბასადორმა თავიდანვე იგდო ხელთ სადავეები, განსაკუთრებით შეტევაში და 6-1 სძლია რთულ მეტოქეს. აკაკი შენგელიამ შესანიშნავი მატჩი ჩაატარა, გიგი მამალაძე კი დუბლით გამოირჩა. ზედიზედ მესამე გამარჯვება ამბასადორს და გუნდი უკვე მეოთხე პოზიციაზეა.

იბერონმა ზედიზედ 6 მოგებული ტურის შემდეგ, მეშვიდე ტურში ჰენკასთან დიდი ანგარიშით წააგო, რის მიზეზიც გუნდის ლიდერების უმეტესობის არყოფნა იყო. ოთხშაბათს მათ ლევან კვიციანიც დააკლდათ და ისეთ ძლიერ მეტოქესთან, როგორიც ინტერსპორტია, მოგების შანსებმა კიდევ უფრო დაიკლო. მაჭავარიანმა დუბლი შეასრულა, ხუჭუამ და გაგნიძემ თითო შეაგდეს, ორი გოლიც იბერონის მოთამაშეებმა საკუთარ კარში გაიტანეს და შედეგად 6-1, ინტერსპორტი იბერონს ქულებით გაუთანაბრდა.

დღის ბოლო დაპირისპირება ყველაზე დაძაბული გამოვიდა - შუნგიტი და მერიის უსაფრთხოება გარდამავალი უპირატესობით თამაშობდნენ, სანამ კონსტანტინე ზარნაძის მესამე გოლმა, გუნდისთვის კი მეოთხემ არ გაიყვანა საბოლოოდ წინ მერიის უსაფრთხოება. შუნგიტი ცდას არ აკლებდა, ბევრს უტევდა, თუმცა ანგარიში ვერ გაათანაბრა. შედეგად 4-3, ზედიზედ მესამე მოგება და მერიის უსაფრთხოება მეექვსე პოზიციაზე არის.

16 ივლისის სათამაშო დღე ისევე გაიხსნა, როგორც 14 ივლისის დაიხურა. სპარტასა და ანაგს შორის შეხვედრა ძალიან დაძაბული გამოდგა და გუნდები მთელი მატჩის მანძილზე ცვლიდნენ გოლებს. საბოლოოდ, ბოჭორმელმა დააწინაურა ანაგი და მათ 4-3 სძლიეს მეტოქეს, ანაგს 16 ქულა აქვს და ისინი მეხუთე პოზიციას იკავებენ.

ჰენკასა და როიალ სითის შორის მატჩი კიდევ უფრო მძიმე და დაძაბული იყო. ფრე დიდი ხნის მანძილზე ფიქსირდებოდა, სანამ გიორგი მაჩხანელმა 2-1 დააწინაურა ჰენკა. მთავარი როლი კი ამ ანგარიშის შენარჩუნებაში ჰენკას კიპერმა, გურამ ბალხამიშვილმა შეასრულა. უამრავი სეივით და დამაჯერებელი თამაშით ის საუკეთესო გახდა, ჰენკა კი ისევ წინ მიიწევს ცხრილში.

ბუდაპეშტსა და ბენე სპორტს შორის მატჩი ტურის ერთ-ერთი ცენტრალური დაპირისპირება იყო და ბუდაპეშტს შანსი ჰქონდა სატურნირო ცხრილს სათავეში მოქცეოდა. გუნდმა ეს შანსი ხელიდან არ გაუშვა, ლიდერები ტრადიციულად ფორმაში იყვნენ, ჯეჯო ჯალიაშვილმა ჰეთ-თრიკი შეასრულა, ბაქრაძემ იდეალურად ითამაშა ორი გაშვებული გოლის მიუხედავად. შედეგად, გუნდმა 5-2 მოუგო ბენე სპორტს და 21 ქულით გალიდერდა სატურნირო ცხრილში.

მანტისი კარგ სვლაზე იმყოფება და ფარული ფავორიტის სტატუსითაც ხვდებოდა მატჩს, არც თუ დამაჯერებლად მოასპარეზე სეუს წინააღმდეგ. სეუ-მ ყველა გააკვირვა და უბრალოდ უნაკლო მატჩი ჩაატარა. რევაზ გოცირიძის თაოსნობით სეუ-ს ბიჭებმა მოახერხეს და მთელი მატჩის მანძილზე დაიჭირეს უპირატესობა. საბოლოოდ 4-2 და სეუ 7 ქულას აგროვებს.