მასტერ ლიგის მეხუთე ტური ტურნირის ლიდერ იბერონსა და სპარტას შორის დაპირისპირებით გაიხსნა. სპარტას ლაშა გურგენიძემ დუბლი შეუსრულა ფავორიტებს, მაგრამ ეს საკმარისი არ აღმოჩნდა განუგრავას დუბლის, ცნობილაძისა და კვიციანის გოლების წინააღმდეგ. იბერონი აგრძელებს უზადო ასპარეზობას და 5 მოგებით იმყარებს ლიდერობას.

მერიის უსაფრთხოება პირველივე ტაიმში დაწინაურდა ანგარიშით 2-0 როიალ სითის წინააღმდეგ, რომელთაც გოლის გატანა დიდხანს არ გამოსდიოდათ. მიუხედავად ამისა, სითის ბიჭები არ დანებდნენ და თორნიკე თოიძის სეივებით გაგულიანებულებმა ბოლომდე იბრძოლეს, 3 გოლი გაიტანეს და მოიგეს თამაში. მძიმე 3 ქულა სითის და რეაბილიტაციის მოტივაცია მერიის უსაფრთხოებას.

23 ივნისს, მანტისისა და ბენე სპორტის დაპირისპირება ბევრი ლამაზი გოლით გამოირჩა. ლუკავას ორივე გოლი ძალიან ლამაზი იყო, მანტისიდან ნაჭყებიამ გაისროლა ბრწყინვალედ. მატჩი მთლიანობაში თანაბარ ბრძოლაში მიმდინარეობდა, მაგრამ მანტისი მაინც ოდნავ უკეთესად გამოიყურებოდა და ეს ანგარიშშიც ზედმიწევნით გამოიხატა. 3-2 მანტისის სასარგებლოდ, ლევან მჭედლიშვილს საუკეთესო მოთამაშის წოდება და დაძაბულ ბრძოლაში მოპოვებული ქულები.

ტურის ცენტრალური მატჩი მერიასა და ინტერსპორტს შორის შედგა. თამაში გარდამავალი უპირატესობით მიმდინარეობდა, თუმცა მის დამთავრებამდე 5 წუთით ადრე ინტერსპორტი 3-2-ს იგებდა და ყველაფერი იქით მიდიოდა, რომ ჩემპიონებს მორიგი 3 ქულა უნდა ჩაეჯიბათ. ფეხბურთში ყველაფერი გეგმის მიხედვით არ მიდის და მერიამ ეს დაამტკიცა, დარჩენილ წუთებში ორი გოლი გაუტანა ინტერსპორტს და ეს ქულებიც თავად ჩაიწერა. კალაძე დუბლით გამოირჩა, 4-3.

მეორე სათამაშო დღე ჰენკასა და გრასრუტს შორის მატჩით დაიხურა. პირველივე წუთებიდანვე აშკარა იყო ჰენკას უპირატესობა და ეს ნარატივი ამ თამაშს ბოლომდე გაჰყვა. ლევან კობიაშვილის მცდელობებმა შედეგი ვერ მოიტანა და გიორგი მაჩხანელისა და მისი თანაგუნდელების სწრაფ შეტევებს გრასრუტი ვერ გაუმკლავდა. 6-3 და მნიშვნელოვანი ქულები გამოცდილი გრასრუტის წინააღდმეგ.

25 ივნისის გახსნითი მატჩი სდსს-სა და 7 კოდს შორის, იმავე ანგრაიშით დასრულდა, რომლითაც 23 ივნისის ბოლო თამაში. 7 კოდმა, როგორც ყოველთვის ბოლომდე იბრძოლა ფავორიტის წინააღმდეგ, თუმცა ბაგალიშვილის გაჩერება ყველასთვის დიდი პრობლემაა... პოკერი გიორგის, ლიდერობა ბომბარდირთა სიაში (15 გოლი). 6-3, დამაჯერებელი გამარჯვება სდსს-ს.

ბუდაპეშტი პირველივე ტაიმში საგრძნობლად მოსწყდა ამბასადორს 3 გოლიანი სხვაობით და მეორეში კიდევ ორი გაუტანა. 5-1 დიდხანს ფიქსირდებოდა ტაბლოზე. გიორგაძის ულამაზესი გოლი არ იყო საკმარისი ჯალიაშვილის და კამპანიის წინააღმდეგ. ამბასადორმა მაინც დაძაბა მაკასარაშვილის დუბლით ბოლო წუთებში, თუმცა ეს საკმარისი არ აღმოჩნდა და ბუდაპეშტმაც მორიგი 3 ქულა მოიპოვა.

ტურის ბოლო დაპირისპირება ანაგსა და შუნგიტს შორის შედგა. თამაშის წინ ანაგს ჰქონდა 7 ქულა, შუნგიტს 6 და ყველა დაძაბულ ბრძოლას ველოდით. საქმე იმაში იყო, რომ ანაგმა გადაწყვიტა ეს მატჩი ყოელგვარი დაძაბულობის გარეშემ მოეგო და 9 უპასუხო ბურთი გაუტანა მეტოქეს. ანაგის შემადგენლობაში ყველა მოთამაშე მოწოდების სიმაღლეზე იყო, თუმცა მიხეილ პაპიაშვილი, რომელმაც ანგრაშიც გახსნა, მაინც გამოირჩეოდა - საუკეთესოს წოდება მიხეილს, 3 ქულა ანაგს, ისინი საოცარ ფორმაში არიან. 

სტატიის ავტორი: ანრი ფხაკაძე