მასტერ ლიგის მეოთხე ტური 14 ივნისს, როიალ სითისა და ბასიანს შორის დაპირისპირებით გაიხსნა. როიალ სითი უდავო ფავორიტი იყო მატჩის წინ და მისი მიმდინარეობისასაც ამაში ეჭვი არავის შეპარვია. არჩილ კელიხაშვილმა ჰეთ-თრიკი გაიფორმა, სითიმ 7-2 და 3 ქულა, ბასიანის წარუმატებელი სერია კი გრძელდება.

7 კოდმა უკვე მოახერხა და ანერვიულა ინტერსპორტი, ახლა ბუდაპეშტის ჯერი დადგა და აქაც საგრძნობი წინააღდეგობა გაუწიეს ფავორიტს. ეს მატჩიც, ინტერსპორტთან დაპირისპირების მსგავსად, 4-2 დასრულდა. ჯეჯო ჯალიაშვილმა ტრადიციულად ჰეთ-თრიკი შეასრულა, მას უკვე 10 გოლი დაუგროვდა, ხოლო 7 კოდის შეტევებს წარმატებით დავით ბაქრაძე უმკლავდებოდა. სწორედ ის დასახელდა საუკეთესოდ და ბუდაპეშტმაც მორიგი 3 ქულა მოიპოვა.

ტურის ცენტრალური დაპირისპირებით გახსნა 16 ივნისის სათამაშო დღე. ანაგს ყველანაირი შედეგი ჰქონდა დაფიქსირებული წინა 3 ტურში. სსდს-ს კი 2 მოგება და ერთი მარცხი ჰქონდა. ანაგის არასტაბილურობის ფონზე სსდს ფავორიტად გამოიყურებოდა, თუმცა ანაგმა ყველაფერი გააკეთა იმისთვის, რომ თბილისის ორგზის ჩემპიონებს თავიანთი ფეხბურთი ვერ ეთემაშათ და შედეგად მთელი თამაშის მანძილზე მხოლოდ ორჯერ დაარტყმევინეს კარში. ორივე შემთხვევაში კარში ბაგალიშვილის დარტყმა წავიდა და აქედან ერთი (ჯარიმა) გაიტანა, თუმცა ეს საკამრისი არ აღმოჩნდა, რადგან ილია გადელიას და კახა კეკოშვილის ორი ზუსტი შორეული დარტყმა და ანაგის იდეალური დაცვა გამარჯვების გარანტი იყო. 2-1, ანაგმა მნიშვნელოვანი თამაში მოიგო.

ინტერსპორტს მეოთხე ტურშიც მდევრის როლის მორგება მოუწია, როცა ამბასადრომა პირველ ტაიმში ორი უპასუხო გოლი გაუტანა. ამ წნეხის ფონზე, მეორე ტაიმში ჩემპიონებს დიდი შრომის გაწევა მოუხდათ და რაც შემდეგ მოხდა, ზუსტად აღწერს რუდი ტომიანოვიჩის ლეგენდარულ სიტყვებს: „Never underestimate the heart of a champion“ და ჩემპიონებმაც საოცარად მოატრიალეს თამაში. განსაკუთრებული მომენტი კი მესამე, ულამაზესი გოლი იყო, რომლითაც ფირანაშვილმა დუბლი გაიფორმა. 3-2 და დასამახსოვრებელი 3 ქულა ინტერსპორტს.

არანაკლებ დაძაბული და ბევრად უფრო უხვგოლიანი გამოდგა დღის ბოლო ჯახი მანტისსა და გრასრუტს შორის. დავით მუჯირმა და რატი ციცქიშვილმა ჰეთ-თრიკები გაცვალეს, თუმცა მანტისმა ერთით მეტი გოლი გაიტანა და 6-5 სძლია მეტოქეს. მანტისმა მნიშვნელოვანი 3 ქულა მოიპოვა ფავორიტის წინააღდეგ.

თავის სადებიუტო თამაშში, რომელიც კალაძეს წინა ტურში ჰქონდა, მოახერხა და 6 გოლი გაიტანა. სწორედ ამის გაკეთება გადაწყვიტა გიორგი ღონღაძემ 18 ივნისის გახსნით მატჩში, რაც მთავარი მიზეზი გახდა იმისა, რომ მისმა შუნგიტმა 8-4 მოუგო სეუს. ეფექტური 3 ქულა და ღონღაძესაც უკვე 9 გოლი აქვს.

ვახსენეთ კახა კალაძის 6 გოლი წინა ტურში და ვეტერანმა არც მეოთხე ტურში დააკლო ბევრი მეტოქეს, შეასრულა რა პოკერი და მერიამ დამაჯერებელი გამარჯვება (4-1) მოიპოვა მატისის წინააღმდეგ, რომელიც გამოტოვებულ მატჩს ანაზღაურებდა.

ბენე სპორტი რომ მშვენივრად ასპარეზობს, ეს ფაქტია და არც მეოთხე ტურის ბოლო შეხვედრა გამოდგა გამონაკლისი. სპარტამ ორი გოლი გაიტანა, თუმცა ბენე სპორტი მაინც აკონტროლებდა მთელ თამაშს და დავით ოდიკაძის შესანიშნავი თამაშის ფონზე, გუნდმა 6 გოლი გამოაცხო. ამას დაემატა კოკა ქუხილავას გაძევებაც და სპარტას ისღა დარჩენოდა შეგუებოდა მარცხს.

სტატიის ავტორი: ანრი ფხაკაძე