მასტერ ლიგამ და კომპანია Apple City-მ IX ტურის საუკეთესოდ ჯეჯო ჯალიაშვილი აღიარა. ეს ფაქტი მოულოდნელი არ იყო, რადგან „ბუდაპეშტის“ 10 ნომერი შესანიშნავ ფორმაშია და გასული წლის მსგავსად საუკეთესოს ტიტულისთვი იბრძვის. გთავაზობთ ინტერვიუს, რომლის საშუალებითაც უკეთ გაიცნობთ ნიჭიერ ფეხბურთელს.

-ჯეჯო მოგესალმები და მოდი გაცნობით დავიწყოთ...

სალამი, მე ვარ ჯეჯო ჯალიაშვილი 30 წლის. პროფესიით ეკონომისტი და საქმიანობით ბიზნესმენი, მაგრამ რაც თავი მახსოვს ფეხბურთი სულ არის ჩემს ცხოვრებაში. 5 წლიდან ეზოში თამაშით დავიწყე და აღარც გავჩერებულვარ. თავიდან 35-ე სკოლაში ვიყავი, შემდეგ იყო „გაგრა“ და უკვე ლატვია სადაც რამდენიმე წელი „დაუგავაში“ პროფესიონალურ დონეზე ვთამაშობდი. სამწუხაროდ, ტრამვის გამო  ვეღარ გავაგრძელე, მერე იყო ხანგრძლივი პაუზა და აგერ უკვე 2 წელია თქვენმა ჩემპიონატმა დამაბრუნა იქ, სადაც ყველაზე მეტად მიყვარს ყოფნა.

-საყვარელი კლუბი რომელია და არჩევანის საშუალება რომ გქონოდა ვისთან ერთად ითამაშებდი?

ბარსა და მესი ჩემი ფავორიტია, თუმცა არ შეიძლება რონალდუს დაუფასებლობაც.  ცოტა ძველებიდან ზინედინ ზიდანს და ტიერი ანრის გამოვარჩევდი. მათთან ერთად თამაში დიდი ბედნიერება იქნებოდა.

-მასტერ ლიგაზე როდის გაიგე...

შარშან, 7x7-ზე ფეხბურთის ფედერაციის პრეზიდენტის აკაკი ხლაბუსტოვისგან გავიგე, რომ იწყებოდა სამოყვარულო ჩემპიონატი. არც დავფიქრებულვარ, ისე ჩავერთე და ფაქტიურად ვცხოვრობ ამ ტურნირით. როცა დრო მაქვს სხვა თამაშებსაც ვესწრები, საკუთარისთვის კი განსაკუთრებით ვემზადები ხოლმე და დიდი სიხარულით ველოდები ყოველ ტურს. უნდა აღვნიშნო, რომ სტადიონის ზომა, ტაიმების ხანგრძლივობა და მთლიანად 7x7-ის სტილი იდეალურია ჩემთვის და ძალიან კომფორტულად ვგრძნობ თავს.

-შენი კონკურენტი გუნდების და ფეხბურთელების შესახებ რას იტყვი?

კონკრეტულად ვერავის გამოვყოფ. ყველა გუნდი, ვინც ფლეი-ოფში გავიდა დამსახურებულადაა და თითოეული მათგანისგან ველოდები თავდაუზოგავ ბრძოლას გამარჯვებისთვის. თუმცა, მე მჯერა ჩემი და ჩემი გუნდის შესაძლებლობების. ძალიან გაგვიჭირდება, ძალიან დაძაბული თამაშები იქნება, მაგრამ მაქსიმალურად დავიხარჯებით. რაც შეეხება საუკეთესოს ტიტულს - დიდი პატივია, ერთხელ უკვე დავიმსახურე და წელსაც არავის დავუთმობ. ყველაფერს გავაკეთებ, რომ ეს აღიარება კვლავ ჩემთან დარჩეს. შარშან ტიტულისთვის წარდგენილები ვიყავით მე, კახი კალაძე და ალექსანდრე იაშვილი. ჯერ მათთან ერთად დგომა რამხელა სტიმულია და წარმოიდგინეთ მათ შორის საუკეთესოდ დამასახელეს, აქედენ გამომდინარე, წელს უბრალოდ უფლებაც არ მაქვს, ეს ყველაფერი არ დავიცვა. ჯერჯერობით, რამდენიმე კონკურენტ ფეხბურთელს არ დავასახელებ მაგრამ ნამდვილად გამოვარჩევდი და მგონია, რომ დიდი შანსები აქვთ, თუმცა მაინც ვფიქრობ, ყველაზე მნიშვნელოვანი მთლიანად გუნდის წარმატება იქნება და სავარაუდოდ სწორედ ეს გადაწყვეტს საუკეთესოს ბედს და ვინაობას.

-საუბრის ბოლოს, როგორ შეაფასებ ჩვენს ტურნირს?

კარგის მეტი არაფერი მეთქმის. მასტერის დამსახურებით გარდა იმისა, რომ მოყვარული ფეხბურთელები დავბრუნდით მოედანზე, ქომაგებიც გააქტიურდნენ, ნახეს რომ იმართება ტურნირი სადაც ძალიან კარგი ფეხბურთელების ჩართულობით ტარდება სანახაობრივი თამაშები. ესწრებიან, გვამხნევებენ და კიდევ უფრო დიდ სტიმულს გვაძლევენ. ვფიქრობ ის მიზანი რაც ამ ჩემპიონატს აქვს დასახული იდეალურად სრულდება. პროპაგანდა ხდება ჯანსაღი ცხოვრების წესის და რაც მთავარია, ჩართულია სრულიად საქართველო. ამ ყველაფერს ერთვის ისიც, რომ მსოფლიო ორგანიზაციაში გაერთიანდით, შანსები გაჩნდა მსოფლიოს მოვლის, სხვადასხვა მაღალი დონის ნაკრებებთან თამაშის და ამაზე მეტი მოტივაცია მოყვარულ ფეხბურთელს ვერაფერი ექნება. დიდ მადლობას გიხდით ამ საქმის კეთებისთვის და ბევრ წარმატებას გისურვებთ.