მასტერ ლიგა 3-ის მეოთხე ტური სკ.ირ-სა და სექტორ 27-ის შორის მატჩით გაიხსნა. სკ.ირ-მა კარგი ბრძოლა შესთავაზა მეტოქეს, თუმცა გიორგი თურმანიძის შესანიშნავი თამაშით და გიგა ივანიძის დუბლით სექტორი უკეთესი იყო. 3-1 და პირველი 3 ქულა სექტორ 27-ს.

ჯოგა ბონიტოსა და ამბრის შორის შეხვედრა კიდევ უფრო დაძაბული გამოდგა. ნიკუშა ქავთარაძემ და თამაზ ცუცქირიძემ დუბლები გაცვალეს. ამ უკანასკნელის გარჯას უფრო პრაქტიკული შედეგი მოჰყვა და ჯოგა ბონიტომ 4-3 სძლია მეტოქეს. მათ 4 ქულა აქვთ, ამბრის 3.

პაკო კვიკვინია ძალიან კარგ ფორმაშია და ეს მან კვირასაც დაადასტურა. მორიგი დუბლი და მისი ვაკე იმარჯვებს, ანგარიშით 5-3 KFC-ის წინააღმდეგ. ვაკე მეხუთეზეა 10 ქულით, ხოლო KFC-ის 3 ქულა აქვს და სატურნირო ცხრილის ქვედა ნაწილში იმყოფება.

ტავ ჯორჯია პირველობისთვის იბრძვის, ისინი მხოლოდ გოლების შეფარდებით ჩამორჩებიან ლისი ლაიონსს. საბა კონსტრაქშენთან მატჩის წინ ისინი ფავორიტებად ითვლებოდნენ, თუმცა თამაში საკმაოდ მძიმე ბრძოლაში წარიმართა - საბას ბიჭები ერთი პერიოდი იგებდნენ კიდეც თამაშს, თუმცა ტავ ჯორჯიამ, დავით დერისიანის ლიდერობით ეს ნავსიც გატეხა და მატჩის მიწურულს გატანილი გოლებით 4-3 იმარჯვა.

ამდენი დაძაბული მატჩის შემდეგ ოდნავ უფრო დამაჯერებელი გამარჯვების დროც დადგა, როცა მეხუთე მატჩში ლისი დეველოპმენტმა ბენროის, ანგარიშით 4-1 სძლია.
ორივე გუნდს ამ ტურამდე 3 ქულა ჰქონდა. ამ ტურის შემდეგ კი ლისი დეველოპმენტი ათეულში შევიდა 6 ქულით.

შემდეგი მატჩი ვი არ იუნაიტედსა და ლისი ლაიონსს შორის გაიმართა, რომელშიც აშკარა ფავორიტები ლომები იყვნენ. ეს სტატუსიც გაამართლეს და ძალიან იოლად,  6:0 სძლიეს თავის ვიზავს. აღსანიშნავია ის ფაქტიც, რომ ამ მატჩში ინციდენტს ჰქონდა ადგილი და მსაჯმა 3 წითელი ბარათი დაურიგა ფეხბურთელებს. საუკეთესო მოთამაშედ ლისი ლაიონსის მეკარე დასახელდა.

დაძაბული და საინტერესო გამოდგა ფეიდეისა და ამბრის მატჩი. ფეიდეის ფეხბურთელებმა თამაშის პირველ ნახევარში შეძლეს 2 გოლის გატანა. თავის მხრივ ამბრიც ცდილობდა გოლის გატანას, თუმცა ფეიდეის მეკარემ, გიორგი გუნდიშვილმა კარი მშრალად შეინახა და გუნდს სასურველი 3 ქულაც მოუტანა. ამბრის ამ მარცხით 4-დან 4 წაგება აქვს, ფეიდემ კი წარუმატებელი სტარტის შემდეგ ზედიზედ მეორე თამაში მოიგო და ცხრილში მე-9 ადგილზე აღზევდა.

ადვოკატთა ასოციაციის გამოცდილი იურისტები დომსონის მშენებლებს დაუპირისპირდნენ. მატჩი დაძაბულ ბრძოლაში მიმდინარეობდა და ასევე დაძაბულად 1:1 დასრულდა. საუკეთესო მოთამაშედ კი გიორგი ფანგანი დასახელდა.

ტურის ცენტრალურმა თამაშმა გლოვოსა და ბეთლაივს შორის აშკარად გაამართლა მოლოდინები. გუნდებს 3 თამაშიდან სამივე მოგება ჰქონდათ. საწყისი წუთები გლოვოს უპირატესობით წარიმართა, რაც მალევე გოლში გაბრიელ ჭოლაძემ გარდასახა. თამაში ორმხრივი შეტევებით გაგრძელდა, თუმცა პირველი ნახევრის მიწურულს თავი ნიკა შანიძემ გამოიჩინა და ბეთლაივმა შეძლო ანგარიშის გათანაბრება. პირველი ტაიმის მსგავსად დაძაბული გამოდგა მატჩის მეორე ნახევარიც. გუნდებმა ამჯერადაც თითო გოლის გატანა მოახერხეს. გლოვოს რიგებში თავი გაბრიელ ჭოლაძემ გამოიჩინა, რითიც დუბლი გაიფორმა. ხოლო, ბეთლაივიდან ნიკა ხომერიკი გახდა გოლის ავტორი და საბოლოო შედეგი ფრე 2:2 დაააფიქსირა.

მე-4 ტურის დასკვნით მატჩში მინისო და შუნგიტი 2  ხვდებოდნენ. თამაში ძალიან დაძაბულად მიმდინარეობდა და ბოლო წუთამდეც ასე გაგრძელდა, სანამ ბოლო წუთზე შუნგიტის ფეხბურთელმა მეოთხედ არ აიღო მინისოს კარი და თავის გუნდს  გამარჯვება მოუტანა. საუკეთესო ფეხბურთელად კი დუბლის ავტორი გიორგი ნარსია დასახელდა.