საგარეჯოს რაიონის სოფელ კაჭრეთში, სასტუმრო „ამბასადორმა“ მასტერ ლიგის ფინალურ ეტაპს და გალა დაჯილდოებას უმასპინძლა.

ქალთა შორის მასტერ ლიგის ფინალურ დაპირისპირებაში აღმოსავლეთ კონფერენციის ჩემპიონმა ხაშურის „ივერიამ“ დასავლეთის გამარჯვებულ „თერჯოლას“ 8:0 მოუგო.

ჰეთ-თრიკი შეასრულა უნიჭიერესმა ფეხბურთელმა ელენე ენჯიბაძემ, დუბლი გაიფორმეს ნინო ბუხრიკიძემ და ირმა ლომიძემ, რომლებიც ქალთა მასტერ ლიგის ნამდვილი აღმოჩენები არიან. ერთი გოლიც ყველაზე პატარა მონაწილის - ლიზი ნიშნიანიძის ანგარიშზეა.

აღსანიშნავია, რომ ნინო ბუხრიკიძემ მასტერ ლიგისგან საუკეთესო ქალი ფეხბურთელის ტიტული დაიმსახურა.

შეგახსენებთ, რომ  ხაშურის „ივერიამ“ თავდაპირველად 1/4 ფინალში სოხუმის „დინამო 1“ 8:1 დაამარცხა, შემდეგ 1/2 ფინალში კი ახალციხის „ზარზმა“ გამოთიშა ასპარეზობას (4:1).

მეორეადგილოსანმა „თერჯოლამ“ კი ფინალამდე ქობულეთის „კვესოს ლომებს“ 4:0 მოუგო და „ჩხოროწყუს“ პენლების სერიაში 6:5 აჯობა.

ტურნირში გოგონების 60-მდე გუნდი დარეგისტრირდა. გამარჯვებულ გუნდს ფულადი ჯილდო 2500 ლარის ოდენობით გადაეცა. მეორე ადგილოსანს - 1500 ლარი, ხოლო მესამეადგილოსანს 1000 ლარი.

პროექტი ქალაქ თბილისის მერიისა და საქართველოს განათლების, მეცნიერების, კულტურისა და სპორტის სამინისტროს დაფინანსებით იმართება, მიზნად კი ფეხბურთის პოპულარიზაციის ხელშეწყობას და ჯანსაღი ცხოვრების წესის დანერგვას ისახავს.