მასტერ ლიგაზე მორიგი ტურის საუკეთესოდ „ბუდაპეშტის“ პირველი ნომერი - გოლკიპერი მაქსიმე ქვილითაია დასახელდა. ბუნებრივია, ჩვენ მისი პერსონით დავინტერესდით და ინტერვიუსაც გთავაზობთ.

-მაქსიმე, გილოცავ საუკეთესოდ აღიარებას და იქნებ ორიოდე სიტყვით თავი გაგვაცნო... 

მე ვარ მაქსიმე ქვილითია, 35 წლის, დავიბადე რუსეთში, 4 წლამდე იქ ვცხოვრობდი და შემდეგ ჩამოვედით საქართველოში. ფეხბურთით 11 წლის ასაკიდან დავინტერესდი. მამა მყავდა მეკარე და მისი სურვილით ტყიბულის „მეშახტეში“ მივედი. თავიდან თავდამსხმელის პოზიციაზე მათამაშებდნენ. დიდად მეც არ მხიბლავდა მეკარეობა, მაგრამ ერთ-ერთ თამაშზე პენალტები დაინიშნა, ჩვენ კი მეკარე დაგვემტვრა და მის ნაცვლად რადგან მაღალი ბავში ვიყავი, მე დამაყენეს. ისე მოხდა, რომ 5-დან 4 ბურთი ავიღე და იქიდან დაიწყო ჩემი მეკარეობა, მამის კვალს გავყევი. 

-საფეხბურთო გამოცდილებაზე მოგვიყევი...

ვთამაშობდი თბილისის “ლოკომოტივში“, მარტვილის „მერანში“, ასევე თემურ ქეცბაიას დროს გამოძახებული ვიყავი ეროვნულ ნაკრებშიც. ვიყავი საჩხერის „ჩიხურაში“, რომელთან ერთადაც უეფაზე ვიღებდით მონაწილეობას. მაშინ ისტორიული გამარჯვება მოვიპოვეთ, პენალტების სერიაში ვიმარჯვეთ და „ბურსასპორი“ გავაგდეთ. 3 წელი ქუთაისის „ტორპედოში“ გავატარე. ჩემპიონები გავხდით, თასი ავიღეთ, უეფაზეც ვიასპარეზეთ, თუმცა ბოლო პერიოდში ნაკლები სათამაშო პრაქტიკა მქონდა და ამ დროს გამოჩნდა წინადადება ირანიდან, დიდი გამოწვევა იყო ჩემთვის და არც დავფიქრებულვარ, ისე წავედი საფეხბურთო კლუბ „ბუშერში“.

-რომ შეადარო დონე და კლასი ირანისა და საქართველოსი...

საფეხბურთო განათლება ქართველებს უკეთესი აქვთ, ფიზიკური მომზადებით კი ირანელები ძალიან მაღალ დონეზე არიან. საოცარი ძალებით და ტემპით შეუძლიათ თამაში. ძალიან განვითარებულია ქომაგობის კულტურაც. საშუალოდ, 20 000 მაყურებელი ესწრება ხოლმე თამაშებს და იმხელა გულშემატკივრობა იგრძნობა, რომ სურვილი გაქვს საერთოდ არ დამთავრდეს თამაში.

-მასტერ ლიგაზე როგორ მოხვდი?

"ბუშერში" 1 წელი ვითამაშე. კონტრაქტი დამიმთავრდა, დავბრუნდი საქართველოში და ვთამაშობდი სამოყვარულო ლიგას. იქ გავიცანი ჯეჯო ჯალიაშვილი, რომელმაც მომიყვა თქვენი ჩემპიონატის შესახებ. ცოტა გვიან ჩავერთე, მაგრამ სიამოვნებით დავთანხმდი და მიხარია რომ მომიწია აქ თამაში. ცოტა განსხვავებული სპეციფიკაა და მეკარისთვის საკმაოდ რთულია. სულ ჩართულ ხარ, პატარა საჯარიმოა და გამოსვლაზე თამაში ჭირს, მაგრამ ერთიანობაში დიდ სიამოვნებას იღებ და ერთგვარი საფეხბურთო პრაქტიკაა. 

-როგორ ფიქრობ, ვინ მოიგებს მასტერ ლიგას?

ბევრი კარგი გუნდი ვნახეთ ამ ტურების განმავლობაში, კარგი თამაშები ჩაატარეს, მაგრამ ფინალამდე ბუნებრივია მიდის ღირსეული და ახლაც ასეა ჩემი აზრით. ძალიან ძლიერი გუნდია SSPS, შეკრულები და შეთამაშებულები, ბევრი პასით თამაშობენ, სულ მოძრაობაში არიან და შედეგსაც დებენ. მათი სახით უძლიერესი კონკურენტი შეგვხვდა და თამაშებიც ურთულესი გამოდგა. რაც შეეხება იბერონს, ნამდვილად კარგი გუნდია, გამოცდილი ბიჭებით დაკომპლექტებული და ვნახოთ.  ალბათ, ძალიან სანახაობრივი ფინალი გვექნება.

-საუბრის ბოლოს შენს გეგმებზეც გვითხარი...

ამ ეტაპზე უგუნდოდ ვარ თავისუფალი აგენტის სტატუსით და ვნახოთ, ველოდები შემოთავაზებებს.  აქვე ვისარგებლებ შემთხვევით და აღვნიშნავ, რომ ძალიან კარგი ჩემპიონატი გაქვთ, კარგად ორგანიზებული და ნამდვილად დიდი სტიმულია ნებისმიერი მონაწილისთვის თუნდაც ტურის საუკეთესოდ დასახელება. ასევე, ბედნიერებაა გამოცდილ, ვეტერან ფეხბურთელებთან თამაში. ტურის სიმბოლურ ნაკრებში კახი კალაძესთან ერთად რომ დავსახელდი, სხვანაირი სიხარული იყო და დავწერე კიდეც ამასაც მოვესწარი-თქო. ასე რომ, დიდ მადლობას გიხდით ამ კარგი საქმის კეთებისთვის და წარმატებებს გისურვებთ.