15 სექტემბერს მასტერ ლიგა მეოთხე ტურის მატჩებით განახლდა. მზიურის მინი სტადიონზე დღის პირველი დაპირისპირება ამბასადორსა და გარეჯს შორის შედგა და ერთბურთიანი სხვაობით ამბასადორელთა გამარჯვებით 7:6 დასრულდა. მოგებულთაგან გოლებით თავი ედგარ კაზარიანმა (ჰეთრიკი), გიორგი კაჭკაჭიშვილმა (დუბლი), გერასიმე რეზესიძემ და გიორგი მარაქველიძემ გამოიჩინეს. გარეჯის რიგებში კი გოლები ლევან კოშაძემ (ჰეთრიკი), გიორგი განუგრავამ, გიორგი ნიჟარაძემ და ტატო ბეჟაშვილმა გაიტანეს. ლურჯ ჯგუფში 4 ქულით მეხუთე პოზიციას იკავებს ამბასადორი, გარეჯს კი 3 ქულა აქვს და მეექვსეზეა.

მინიმალური სხვაობით 0:1 დამარცხდა კვარტალი IFK ანაგთან გამართულ შეხვედრაში. მატჩის ერთადერთი გოლი კახაბერ კეკოშვილის ანგარიშზეა. აღსანიშნავია, რომ ანაგს 5 ქულა აქვს და მწვანე ჯგუფის სამეულს ხურავს. კვარტალი კი 1 ქულით მერვე ადგილზეა.

მწვანე ჯგუფის ლიდერი იბერონი, რომელსაც 12 გატანილი გოლი აქვს და პირველ ადგილს იკავებს, აუტსაიდერ GRASSROOT დაუპირისპირდა და 4:2 დაამარცხა. გამარჯვებულთაგან დუბლი შეასრულეს თემურ ჯაფარიძემ და ირაკლი მოდებაძემ. გრასრუტიდან კი ასევე დუბლით ალექსანდრე ამისულაშვილი გამოირჩა.

მეოთხე ტურიში მორიგი 3  შეხვედრა 16 სექტემბერს გაიმართა. დღის პირველი დაპირისპირება მანტისს და ტიბიას შორის გაიმართა და ლურჯი ჯგუფის მესამეადგილოსანი მანტისის მოგებით 5:1 დასრულდა. გამარჯვებულთაგან ვასილ აფციაურის ჰეთრიკი, ვახტანგ შემაზაშვილის და როსტომ ციცქიშვილის გოლები ვიხილეთ. ერთადერთი საპასუხო ბურთი კი ტიბიადან ლაშა ქაფიანიძემ გაიტანა.

დღის ცენტრალური დაპირისპირება თბილისის მერიასა და ბენე სპორტს შორის შედგა. მატჩში მასტერ ლიგის ისტორიაში ყველაზე მეტი გოლი გავიდა და ისიც მხოლოდ ბენე სპორტის კარში. მერიის გუნდმა საუცხოოდ ითამაშა და 13:0 მოიგო. პოკერი შეასრულა დედაქალაქის მერმა კახა კალაძემ და ბომბარდირთა დავაში ჩაერთო, ასევე პოკერი შემოგვთავაზა ნიკოლოზ გაბრიჩიძემაც, რომელიც მატჩის საუკეთესოდაც აღიარეს და ერთ-ერთი ბომბარდირიცაა, დუბლები გაიფორმეს ლაშა ხატიაშვილმა და გივი კვარაცხელიამ, ერთი გოლიც ლევან ჩიხრაძის ანგარიშზეა. მერია 7 ქულით ჯგუფში მეოთხე, ბენე სპორტი კი კვლავ უქულოდ დარჩა და ბოლო ადგილს იკავებს.

დღის დასკვნითი შეხვედრა კი ზოომარტსა და ბასიანს შორის შედგა. ძალიან სანახაობრივი და დაძაბული მატჩი ბოლო წამებზე გატანილი გოლით ზოომარტმა 6:5 მოიგო. ჰეთრიკი შეასრულეს გიორგი ყაზარაშვილმა და გიორგი ხიდეშელმა. ბასიანიდან კი თორნიკე კირკიტაძე (დუბლი), გიგი ბერძენიშვილი, ლადო ხიდაშელი და ნოდარ ბაკურაძე გამოირჩნენ. დღეის მონაცემებით ზოომარტი ჯგუფში მეშვიდე, ბასიანი კი მეცხრე ადგილს იკავებს.

მეოთხე ტურის ბოლო სათამაშო დღეს, მზიურის მინი სტადიონმა 4 დაპირისპირებას უმასპინძლეა. პირველი მატჩი მერიის უსაფრთხოებამ ბუდაპეშტის წინააღმდეგ გამართა და 4:5 დამარცხდა. გამარჯვებულთაგან ლუკა ბლიაძის პოკერი და ჯეჯო ჯალიაშვილის გოლი ვიხილეთ. მერიიდან კი თითო გატანილი გოლით ვნახეთ მიხეილ  ყიასაშვილის, თორნიკე თარხნიშვილის, კოტე ზარნაძისა და აკაკი ტეტუნაშვილის შესრულებით. ბუდაპეშტს 9 ქულა აქვს და ჯგუფში მეორე პოზიციას იკავებს, უსაფრთხოება კი 3 ქულას ფლობს და მერვე ადგილზეა.

რიგით მეორე თამაში ირაოსა და სეუს შორის გაიმართა და ამ უკანასკნელის გამარჯვებით 1:7 დასრულდა. პრესტიჟის გოლი ლევან ჟვანიამ ითავა. სეუს რიგებში კი ნიკა მანგოშვილმა (ჰეთრიკი), გუგა ნერგაძემ, ზურა ფიჩხაძემ, სერგი მაკარაშვილმა და ოთარ კუხალეიშვილმა გაიტანეს. არსანიშნავია, რომ სეუს 10 ქულა აქვს და  ჯგუფში მეორე ადგილს იკავებს, ირაო კი 4 ქულით მერვეზეა.

4:2 მოუგო მთაწმინდამ საჯარო რეესტრს. დუბლი გაიფორმა გიორგი კირკველიამ, თითო გოლი კი ნიკა ფირცხალავამ და გიორგი ნათიძემ გაიტანეს. რეესტრიდან დავით გუჯაბიძე და ნიკა ბუნოიანის  გატანილი გოლები ვიხილეთ. სატურნირო ცხრილის მიხედვით მთაწმინდა მეხუთე, რეესტრი კი მეშვიდე ადგილს იკავებს.

კიდევ ერთ შეხვედრაში აფხაზეთი ლურჯი ჯგუფის ლიდერ SSPS-ს შეხვდა და ძალიან დაძაბულ ბრძოლაში 5:6 დამარცხდა. აფხაზეთიდან, რომელიც 6 ქულით ჯგუფში მეექვსე საფეხურზეა, ნუკრი გოგოხიას დუბლი, ლუკა ხომასურიძის, გიგი ვასაძის და ელგუჯა ავსაჯანიშვილის გოლები გავიდა. სსპს რიგებში კი გიორგი ბაგალიშვილმა (დუბლი), ბადრი ტეტუნაშვილმა, მიხეილ კენჭაძემ და გიორგი ცაავამ გაიტანეს.

მეოთხე ტურის საუკეთესოები: ილია გადელია (იფკ ანაგი), ირაკლი მოდებაძე (იბერონი), ედგარ კაზარიანი (ამბასადორი), ვასილ აფციაური (მანტისი), გიორგი ყაზარაშვილი (ზოომარტი), ნიკოლოზ გაბრიჩიძე (თბილისის მერია), ლუკა ბლიაძე (მერიის უსაფრთხოება), გიორგი კვირკველია (მთაწმინდა), ნიკოლოზ მანგოშვილი (სეუ), გიორგი ბაგალიშვილი (სსპს) ტრადიციულად მასტერ ლიგის მხარდამჭერმა კომპანია ესტრელამ დააჯილდოვა.