26 აგვისტოს, მასტერ ლიგის 2020 წლის სეზონის პირველი ტური 3 მატჩით გაიხსნა. პირველ შეხვედრაში ერთმანეთს თბილისის მოქმედი ჩემპიონი SSPS და დებიუტანტი ამბასადორი დაუპირისპირდნენ. თამაში ფრედ 1:1 დასრულდა. გოლებით თავი ამბასადორის 10-მა ნომერმა ედგარ კაზარიანმა და SSPS-დან მიხეილ კენჭაძემ გამოიჩინეს.

მეორე დაპირისპირება საქართველოს MASTER CUP-ის მოქმედ ჩემპიონ თბილისის მერიასა და IFK ანაგს შორის შედგა. აქაც ფრე 2:2 დაფიქსირდა. IFK ანაგიდან გოლები ილია გადელიამ და მიხეილ პაპიაშვილმა გაიტანეს. მერიის გუნდიდან კი ლაშა ხატიაშვილის და ლევან ჩიხრაძის გოლები ვიხილეთ.

პირველი ორი მატჩისგან განსხვავებით, სადაც გამარჯვებულები ვერ გამოვლინდა, მესამე შეხვედრაში იბერონმა მოახერხა დებიუტანტი ირაოს დამარცხება ანგარიშით 3:2 . აღსანიშნავია, რომ ირაო შეხვედრას 2:0 იგებდა, თუმცა იბერონი არ დანებდა და უმნიშვნელოვანესი 3 ქულა ჩაიწერა აქტივში.  გამარჯვებულთაგან დუბლი შეასრულა აკაკი წყაროზიამ, 1 გოლით კი გუნდს ირაკლი ქაჩავა დაეხმარა. ირაოს რიგებში გოლის ავტორები კოტე გაბაშვილი და დავით ყიფიანი გახდნენ.

მატჩის საუკეთესო მოთამაშეებად ედგარ კაზარიანი (ამბასადორი), ლევან ჩიხრაძე (თბ.მერია) და დავით ბაბუნაშვილი (ირაო) დაასახელეს, რომლებიც მასტერ ლიგის მხარდამჭერმა კომპანია ესტრელამ დაასაჩუქრა.

27 აგვისტოს 20:00 საათზე ზოომარტი მანტისს დაუპირისპირდება, GRASROOT ბენე სპორტს შეხვდება, კვარტალი კი საჯარო რეესტრთან გაარკვევს ურთიერთობას.