25, 26 და 27 ივნისს, თბილისის მასტერ ლიგის მწვანე და ლურჯი ჯგუფების მე-7 ტურის მატჩები გაიმართა.

აღნიშნული ტურის ცენტრალურ შეხვედრას ლურჯი ჯგუფის ლიდერების საჯარო რეესტრისა და გრასრუტის დაპირისპირება წარმოადგენდა. თუმცა, შეიძლება ითქვას რომ გულშემატკივრების მოლოდინი აღნიშნული მატჩის მხოლოდ პირველმა სამმა წუთმა გაამართლა, როდესაც ნიკოლოზ მაისურაძის გოლს მყისიერად უპასუხა გრასრუტმა და შესანიშნავად გათამაშებული კომბინაცია გოლით დავით მუჯირმა დააგვირგვინა. ანაგარიშის გათანაბრების შემდეგ თვალშისაცემად იგრძნობოდა გრასრუტის უპირატესობა და საბოლოოდ შეხვედრაც გრასრუტის გამარჯვებით 11:4 დასრულდა. აღნიშნულ შეხვედრაში პოკერით გამოირჩა ალექსანდრე იაშვილი, რომელმაც შესანიშნავად ითამაშა და მოედანზე მისულ გულშემატკივარს რამდენიმე დასამახსოვრებელი ეპიზოდიც აჩუქა. ამ მოგებით გრასრუტმა ლურჯ ჯგუფში I ადგილზე გადაინაცვლა და სატურნირო ცხრილს სათავეში ჩაუდგა.

ძალიან დიდ მნიშვნელობას ატარებდა ლურჯი ჯგუფის კიდევ ერთი მატჩი, რომელიც თიბისისა და RR ESTATE-ს შორის გაიმართა. აღსანიშნავია, რომ თიბისი იბრძვის საჩემპიონო ოთხეულში მოსახვედრად, ხოლო RR ESTATE 2020 წლის მასტერ ლიგის საგზურის მოსაპოვებლად. მატჩი უხვგოლიანი და სანახაობრივი გამოდგა. კვლავ ჩინებულად გამოიყურებოდა თიბისის ლიდერი სოსო მალანია, თუმცა RR ESTATE-ის ლიდერობა საკუთარ თავზე აიღო გიგი მამალაძემ, რომელმაც მეტოქეს პოკერი შეუსრულა და საკუთარ გუნდს მეტად მნიშვნელოვანი 3 ქულა მოუტანა.

სეუმ, ძალიან მარტივად 11:0 იმარჯვა ტვ იმედზე. აღნიშნულ შეხვედრაში 8 გატანილი გოლით გამოირჩა ნიკოლოზ მანგოშვილი და თუ იმასაც გავითვალისწინებთ, რომ სეუმ ყველა ლიდერთან უკვე ითამაშა, ამ მოგებით მათ პრაქტიკულად გაინაღდეს საჩემპიონო ფლეიოფში მოხვედრა.

უხვგოლიანი და საინტერესო გამოდგა მწვანე ჯგუფის შეხვედრებიც.

SSPS -მა ძალიან მარტივად და დამაჯერებლად, 11:3 იმარჯვა შესუსტებული შემადგენლობით მოასპარეზე „კროკობეთზე“. ძალოვანთა რიგებში ლაშა ნამორაძემ, ნიკა ოთინაშვილმა და მიხეილ კენჭაძემ შეძლეს ჰეთთრიკის შესრულება და აღნიშნული მოგებით SSPS-მა საბოლოოდ გაინაღდა საჩემპიონო ფლეიოფში ადგილი.

საჩემპიონო ფლეიოფში გაინაღდა ადგილი თბილისის მერიამაც, რომელმაც ტიბიას 9:5 სძლია. აღნიშნულ შეხვედრაში გამოირჩა ლევან ჩიხრაძე, რომელმაც 2 გოლთან ერთად 3 საგოლე გადაცემა შეასრულა და მისი შეჩერება ნამდვილი თავსატეხი აღმოჩნდა ტიბიასათვის.

ყველასათვის მოულოდნელად, მწვანე ჯგუფის აუთსაიდერმა აი გრუპმა დიდი ბრძოლა გაუმართა მწვანე ჯგუფის ერთ-ერთ ლიდერს „იბერონს“ და შეხვედრის პირველ ტაიმში ორჯერ მოახერხეს დაწინაურება. თუმცა, ორივე შემთხვევაში იბერონმა მოახერხა ჩამორჩენის აღმოფხვრა და შეხვედრის პირველი ნახევარი საყაიმო ანგარიშით 2:2 დასრულდა. მეორე ტაიმში იბერონის ფეხბურთელებმა შეძლეს მატჩში გარდატეხის შეტანა. ჯერ გიორგი თავბერიძემ შესანიშნავი გასროლით დააწინაურა იბერონი, ხოლო შემდგომ საბა უგრეხელიძემ და გიორგი მოდებაძემ 4 ბურთიანი გახადეს იბერონის უპირატესობა და მატჩიც 6:2 იბერონის გამარჯვებით დასრულდა. ამ მოგებით, იბერონმა კვლავ დაიბრუნა საჩემპიონო ფლეიოფის ოთხეულში ადგილი.

წინა ტურში განცდილი მარცხის შემდეგ, ბუდაპეშტმა მოახერხაა გონს მოსვლა და ძალიან მარტივად 9:1 დაამარცხა ქიუ-ნეთი. ბუდაპეშტის შემადგენლობაში შესანიშნავი შეხვედრა ჩაატარა ლევან სვანიძემ, რომელმაც მეტოქეს პოკერი შეუსრულა და მატჩის საუკეთესო ფეხბურთელის წოდებაც დაისაკუთრა.

მწვანე ჯგუფის ცენტრალური შეხვედრა გაიმართა LPA GINVENTOR-სა და კრწანისს შორის. აღნიშნულ ტურამდე გუნდები სატურნირო ცხრილში მე-3 და მე-4 ადგილს იკავებდნენ და ხსენებულ დაპირისპირებას უდიდესი მნიშვნელობა ჰქონდა ორივე გუნდისათვის. მატჩმა ნამდვილად გაამართლა მოლოდინი და შეხვედრა დაძაბულად, ორმხრივ შეტევებში წარიმართა. თუმცა, დამაგვირგინებელ ფაზაში უფრო ზუსტი აღმოჩდნენ კრწანისის ფეხბურთელები და ლევან კასრაძისა და თეიმურაზ ჯაფარიძის გოლების წყალობით გუნდი 2:0  დაწინაურდა. LPA GINVENTOR-ს სასახელოდ უნდა ითქვას, რომ მათ ბოლომდე იბრძოლეს, თუმცა მატჩის მიწურულს გატანილი ერთი გოლო საკმარისი არ აღმოჩნდა მატჩის გადასარჩენად. LPA GINVENTOR-მა ამ მარცხით მე-3 ადგილიდან მე-5 ადგილზე ჩამოინაცვლა და დარჩენილ ორ ტურში კვლავ ეცდება საჩემპიონო ფლეიოფის ზონაში დაბრუნებას.

თბილისის მასტერ ლიგის VII ტურის სიმბოლური ნაკრები და ბომბარდირების შვიდეული შემდეგნაირად გამოიყურება: