7 მაისს მასტერ ლიგა იწყება!
1 მაისს, დავით პეტრიაშვილი არენაზე, 7x7 ფეხბურთის ასოციაციის პროექტების მასტერ ლიგისა და მასტერ ქაფის პრეზენტაცია გაიმართა. ღონისძიების ფარგლებში თბილისის მასტერ ლიგის წილისყრაც შედგა.
წილისყრის შედეგად თბილისის მასტერ ლიგის მონაწილე ოცი გუნდი, მწვანე და ლურჯ ჯგუფებში გადანაწილდა (10 გუნდი თითოეულში). გუნდი 1 წრედ ითამაშებს ყველა მოწინააღმდეგესთან, ხოლო შემდგომ პირველ 4 ადგილზე გასული გუნდები ფლეიოფში დაუპირისპირდებიან ერთმანეთს.
ღონისძიებას საქართველოს ფეხბურთის ფედერაციის, ქართული ფეხბურთის განვითარების ფონდისა და ქალაქ თბილისის მერიის წარმომადგენლები დაესწრნენ. ოფიციალურმა პირებმა დამსწრე საზოგადოებას სიტყვით მიმართეს და პროექტის მნიშვნელობაზე ისაუბრეს.
დედაქალაქის პარალელურად, 7x7-ზე ფეხბურთის ასოციაციის პროექტებში საქართველოს 11 რეგიონის ყველა მუნიციპალიტეტი ჩაერთო. პროექტის მიზანი ფეხბურთის მასობრიობის გაზრდასთან ერთად, საზოგადოებაში ჯანსაღი ცხოვრების წესის დამკვიდრებაა. მთელი ქვეყნის მასშტაბით, გუნდების რაოდენობამ 212 შეადგინა.
7x7 ფეხბურთის ასოციაციის აღნიშნული პროექტები - საქართველოს ფეხბურთის ფედერაციის, ქართული ფეხბურთის განვითარების ფონდისა და თბილისის მერიის დაფინანსებით ხორციელდება.