2020 წლის სეზონში, თბილისის მასტერ და ჩელენჯ ლიგაზე ბევრი საინტერესო გუნდი ასპარეზობდა. თავისი პროგრესითა და მიღწევებით ერთ-ერთი ყველაზე გამორჩეულია გუნდი „ინტერსპორტი“, რომელიც ბიზნესმენმა და ყოფილმა ფეხბურთელმა კობა ახალკაცმა თავისი კომპანიის სახელით დაარეგისტრირა. კომპანია „ინტერსპორტი“ საქართველოს მასშტაბით სპორტულ მოედნებს აკეთებს, ეს იქნება ხელოვნური საფარი, განათება, დარბაზები თუ სხვა. სპორტთან სიახლოვის და ჯანსაღი ცხოვრების წესის პროპაგანდის მიზნით კომპანიამ უცხოელ პარტნიორთან ერთად გადაწყვიტა დაეარსებინა საფეხბურთო გუნდი, რომელიც მაქსიმალურად ჩაერთვებოდა სხვადასხვა ტურნირებში. ამ დროს გაირკვა მასტერ ლიგის შესახებ და ფეხბურთელებიც სიამოვნებით დარეგისტრირდნენ. დაიწყეს ჩელენჯ ლიგით, მთელი ტურნირი ერთადერთი წაგებით ჩაამთავრეს და საკუთარი ჯგუფის გამარჯვებულები სრულიად დამსახურებულად გახდნენ. მასტერ ლიგის წესების თანახმად,  ჩელენჯ ლიგის გამარჯვებული საქართველოს მასტერ ქაფზე განაგრძობს ასპარეზობას და ბუნებრივია, ასე მოხდა ინტერსპორტის შემთხვევაშიც. გუნდს მოუწია ურთულესი მატჩების გამართვა და დიდი ძალისხმევის, გუნდურობის და პროფესიონალიზმის წყალობით საქართველოს მასტერ ქაფის აღმოსავლეთ კონფერენციის ფინალში გავიდა, სადაც თბილისის ჩემპიონს  SSPS-ს დაუპირისპირდა, დაძაბულ ბრძოლაში საბოლოოდ  2:0 დაამარცხა და სუპერ ფინალის საგზური მოიპოვა, სადაც ბათუმის „რიოს“ შეხვდა. დრამატულ ბრძოლაში ინტერსპორტელებმა აქაც იმარჯვეს (7:5) და საქართველოს MASTER CUP-ის 2020 წლის გამარჯვებულები გახდნენ.

ინტერსპორტის წარმატების შესახებ გუნდის მენეჯერმა კობა ახალკაცმა ისაუბრა. მისი თქმით, გუნდში დიდი სულისკვეთება და ჟინია. ფეხბურთელებს კარგი მეგობრობა და ერთმანეთის მიმართ დიდი პატივისცემა აკავშირებთ. გამარჯვებისთვის ჯანსაღი ამბიცია გააჩნდათ და ყველაფერი გააკეთეს, რომ  master cup-ის გამარჯვებულები გამხდარიყვნენ.

გუნდის ერთ-ერთი მთავარი ფიგურაა ერეკლე ხაჭვანი, რომელიც ჩელენჯ ლიგის საუკეთესო ფეხბურთელადაც აღიარეს. იგი ყოფილი პროფესიონალი მოთამაშეა და აღნიშნავს, რომ მასტერ ლიგა დიდ სიხარულს და ბედნიერებას ანიჭებს. დარწმუნებული იყო გუნდის წარმატებაში და შედეგით ძალიან კმაყოფილია.

ფინალური დაპირისპირების შემდეგ მატჩი ინტერსპორტის ერთ-ერთმა ფეხბურთელმა გიორგი ალავიძემც შეაფასა: „პირველად მაქვს საშუალება და მინდა მადლიერება გამოვხატო ამ არაჩვეულებრივი პროექტისთვის. იმისთვის, რომ ზრუნავთ საქართველოში სპორტის განვითარებაზე, ჯანსაღ ცხოვრებაზე და ამ ყველაფრისთვის „ინტერსპორტის“ სახელით უდიდეს მადლობას გიხდით. რაც შეეხება ფინალს, ვფირობ რომ ერთი სულისკვეთებით გამოვედით და დამსახურებულად გავიმარჯვეთ“.

ასევე კომენტარი გააკეთა ინეტსპორტის მცველმა დავით გაგნიძემ: „ძალიან დაძაბული თამაშები იყო. ყოველ მატჩს სრული სერიოზულობით ვეკიდებოდით და მოსაგებად ვთამაშობდით. მადლობას ვუხდი ორგანიზატორებს, ჩემს გუნდს, გულშემატკივრებს და მოწინააღმდეგეებს ამ საინტერესო შეხვედრებისა და კარგი ემოციებისთვის. რაც შეეხება ფინალს, ვთვლი რომ დამსახურებულად გავედით და თავი არ დაგვიზოგავს  გამარჯვებისთვის“.

აღსანიშნავია, რომ 7x7-ზე ფეხბურთის ასოციაციამ MASTER CUP-ის , MASTER LEAGUE-სა და CHALLENGE LEAGUE-ს სხვადასხვა პოზიციებზე მოთამაშე საუკეთესო ფეხბურთელები დაასახელა. ინტერსპორტიდან MASTER CUP-ის უნივერსალი - ოთარ გაგნიძე გახდა. საუკეთესო ფეხბურთელად თორნიკე მაჭავარიანი, საუკეთესო თავდამსხმელად კი გიორგი ფირანაშვილი დაასახელეს. საუკეთესო მენეჯერის ტიტული კობა ახალკაცს ერგო.

რაც შეეხება CHALLENGE LEAGUE-ს, უნივერსალი გიორგი ფირანაშვილი გახდა. საუკეთესო ფეხბურთელი ერეკლე ხაჭვანი, საუკეთესო მეკარე კი საბა კობერიძე.

ასე და ამგვარად, გუნდურობამ, ფეხბურთის სიყვარულმა და შრომამ შედეგი გამოიღო და ჩემპიონატის დებიუტანტი „ინტერსპორტი“ საქართველოს MASTER CUP-ის და CHALLENGE LEAGUE-ს 2020 წლის ჩემპიონია.